މިދިޔަ ބުދަ ދުވަހު ނެރުނު މި ރިޕޯޓުގައި ފާހަގަކޮށްފައިވާ ގޮތުން ހިތަދޫގެ ޕްލާންޓުން އުފައްދާފައިވާ ފެނުގެ 54 ޕަސަންޓް އަދި ހުޅުމީދޫގެ ޕްލާންޓުން އުފައްދާފައިވާ ފެނުގެ 16 ޕަސަންޓް ބިމަށް ލީކުވެފައިވެއެވެ.
އޮޑިޓް ރިޕޯޓުގައި ފާހަގަކޮށްފައިވާ ގޮތުން، މިހާ ގިނަ އަދަދެއްގެ ފެން އިސްރާފުވެގެން ދިޔަ މައިގަނޑު ސަބަބަކީ އައްޑޫގެ މަގުތައް އެކިއެކި ބޭނުންތަކަށް ކޮނުމުގެ ތެރޭގައި ބަލަންވާވަރަށް ނުބަލާތީ ފެންހޮޅިތައް ފަޅައިގެން ގޮސް ބިމަށް ފެން ބޭރުވާތީއެވެ. އަދި ފެން ލީކުވާ ސަރަހައްދާއި ލީކުވާކަން ވަގުތުން އެނގޭނެ ނިޒާމެއް އައްޑޫ ފެން ޕްލާންޓްތަކުގައި ހަރުކޮށްފައި ނުވާކަން ވެސް ރިޕޯޓުގައި ފާހަގަކޮށްފައިވެއެވެ. ގެއްލުން ލިބުނު ނަމަވެސް އެކަންތައް ފެނަކައަށް ބައެއް ފަރާތްތަކުން އަންގަމުން ނުދާކަން ވެސް ރިޕޯޓުގައި ފާހަގަކޮށްފައިވެއެވެ.
ޔުޓިލިޓީ ރެގިއުލޭޓަރީ އޮތޯރިޓީން 2022 ވަނަ އަހަރު ލާޒިމްކޮށްފައިވާ ފެނުގެ ސާފުތާހިރުކަން ކަށަވަރުކުރުމަށް ހަދަންޖެހޭ 11 ޓެސްޓެއް ފެނަކައިން ހަދާފައިނުވާކަން ވެސް އޮޑިޓުން ފާހަގަކޮށްފައިވެއެވެ. ބައެއް ޓެސްޓްތައް ހަދަން ފެނުގެ ސާމްޕަލް މާލޭގައި ހުންނަ މައި އޮފީހަށް ފޮނުވި ނަމަވެސް، އެ ޓެސްޓްތައް ހެދިކަމުގެ ރިޕޯޓް ފެންނަން ނެތްކަމަށް އޮޑިޓަރުން ފާހަގަކޮށްފައިވެއެވެ. މިކަމުގެ ސަބަބުން އައްޑޫސިޓީގެ ރައްޔިތުން ބޭނުންކުރަމުންދާ ފެނުގެ ސާފުތާހިރުކަން ކަށަވަރެއް ނުކުރެވޭކަމަށް އޮޑިޓް ރިޕޯޓުގައި ބުނެފައިވެއެވެ.
