ރައްޔިތުން މަޖލީޙުގެ މި ދައުރުގެ އެންމެ ފަހު ޖަަލްސާ މިއަދު މެންދުރު 13:30 ގައި ބާއްްވަން ވަނީ ތާވަލުކޮށްފައެވެ. މި ޖަލްސާ މިއަދު ބާއްވަން ބައެއް ކޮމެޓީތަކުގެ މަސައްކަތް ރޭ ދަންވަރުވެސް ވަނީ ބާއްވާފައެވެ. އަދި މެމްބަރުންނަށް ޖަލްސާގެ އެޖެންޑާ ފޮނުވާފައިވަނީ ރޭ ފަތިހު 3 ޖެހިފަހުންނެވެ.
މިއަދު ޖަލްސާގެ އެޖެންޑާގައި އެންމެ ފުރަތަމަ އޮތީ ޓްރާންސްޕޯޓް މިނިސްޓަރު މުހައްމަދު އަމީންގެ އިތުބާރު ނެތް ކަމުގެ މައްސަލައެވެ.
ހައްވާ ޔުމްނު ރަޝީދު ވެއްޓުމުގެ ހާދިސާގެ ތަހުގީގަށް ނުފޫޒު ފޯރުވާފައިވާ ކަމަށް ތުހުމަތުކޮށް ޓްރާންސްޕޯޓް މިނިސްޓަރު މުހައްމަދު އަމީންގެ އިތުބާރު ނެތް ކަމުގެ މައްސަލަ މަޖިލިހަށް ވެއްދީ އިދިކޮޅު އެމްޑީޕީގެ 12 މެމްބަރުންގެ ސޮޔާ އެކުއެވެ. މައްސަލައިގެ ނޯޓިސް އަމީންއަށް ފޮނުވީ މިމަހު 1 ވަނަދުވަހުއެވެ.
އަމީންގެ އިތުބާރު ނެތްކަމަށް ބުނެ އެމްޑީޕީން ހުށައެޅި މައްސަލަގައި ފާހަގަކޮށްފައިވާ ކަންކަމުގެ ތެރޭގައި ފުލުހުން އަމީންގެ ގެ ފާސްކުރަމުން ދިޔަ ވަގުތު އަމީން އޭރުގެ ޕޮލިސް ކޮމިޝަނަރު އަލީ ޝުޖާއަށް ފޯނުން ގުޅުއްވުން ވަނީ ފާހަގަކޮށްފައެވެ މީގެއިތުރިން ސީސީޓީވީ ކެމެރާ އެ ގޭގައި ހަލާކުވެފައިވާ ކަމަށް ބުނެ ސީސީޓީވީ ފުޓޭޖުތައް ބަލަން ފުލުހުންނަށް ނުދިނުމަކީވެސް ކަންބޮޑުވުމެއް ގޮތުގައި ވަނީ ފާހަގަކޮށްފައެވެ.
