މި އެލާޓަކީ ހއ. އަތޮޅުން ފެށިގެން ޅ. އަތޮޅާ ދެމެދުގެ ސަރަހައްދަށް ނެރެފައިވާ އިންޒާރެކެވެ.
މޫސުމާ ބެހޭ ގައުމީ އިދާރާއިން ބުނީ އެ ސަރަހައްދަށް ގަޑިއަކު 19 މޭލާއި 24 މޭލާ ދެމެދުގެ ބާރުމިނުގައި ވައި ޖެހި، ކަނޑުތައް ގަދަވާނެ ކަމަށް ލަފާކޮށް ރޭ ދަންވަރުން ފެށިގެން މި ސަމާލު ނެރެފައިވާ ކަމަށެވެ. އެހެންކަމުން އެ ސަރަހައްދުގައި ކަނޑުދަތުރު ކުރާ ފަރާތްތަކަށް މޫސުމަށް ސަމާލުވުމަށް އެ އިދާރާއިން އިލްތިމާސްކޮށްފައިވެ އެވެ.
ކުރިއަށް އޮތް 24 ގަޑިއިރުގެ ތެރޭގައި އުތުރުގެ ބައެއް ރަށްތަކަށް ކެރީގެ އަސަރު ފޯރައި، ގުގުރުން އެކަށީގެންވާ ކަމަށް އެ އިދާރާއިން ވަނީ އަންގައިފަ އެވެ. ނަމަވެސް ރާއްޖޭގެ އެހެން ހިސާބުތަކުގެ މޫސުން ރަނގަޅު ކަމަށް ލަފާކޮށްފައިވެ އެވެ. މިހާރު ރާއްޖެއަށް ހުޅަނގު މޫސުން ވަނީ ފެށިފައި ކަމާއި، މިހާރު މި ކުރަނީ އެ މޫސުމުގެ ވިއްސާރަ ކަމަށް މޫސުމާ ބެހޭ އިދާރާއިން މައުލޫމާތު ދިނެވެ.
