ރަށްރަށުގައި ދިރިއުޅޭ ކަސްޓަމަރުންގެ މާލީ ހަރަކާތްތައް ވަރަށް ބޮޑަށް އިތުރުވެފައިވާ ކަމަށް ފާހަގަކުރައްވަމުން، އަތޮޅުތެރޭގައި އޭޓީއެމްތައް ގާއިމުކުރުމުގެ މުހިންމުކަމަށް ޝަރީފް އަލިއަޅުވާލެއްވިއެވެ.
"މުޅި ރާއްޖެއަށް ބީއެމްއެލް އޭޓީއެމް" މަޝްރޫއުގެ ދަށުން މިއަހަރު ނިމުމުގެ ކުރިން މީހުން ދިރިއުޅޭ ކޮންމެ ރަށެއްގައިވެސް އޭޓީއެމް ގާއިމުކުރުމަށް ބީއެމްއެލްއިން ދަނީ މަސައްކަތްކުރަމުންނެވެ.
މިހާތަނަށް މި އަހަރު 37 ރަށެއްގައި ސެލްފް ސަރވިސް ބޭންކިންގ ހިދުމަތް ވަނީ ގާއިމުކޮށްފައެވެ. މީގެ ތެރެއިން އެންމެ ފަހުން ށ. އަތޮޅުގެ 10 ރަށެއްގައި އޭޓީއެމް ހިދުމަތް ތައާރަފުކޮށް، އެ އަތޮޅުގެ ހުރިހާ ރަށެއްގައި މިހާރު ވަނީ އޭޓީއެމް ހިދުމަތް ލިބެން ފަށާފައެވެ.
މި މަޝްރޫއަކީ ކަސްޓަމަރުންގެ އަސާސީ ބޭންކިންގ ހިދުމަތްތައް ދިރިއުޅޭ ރަށެއްގައި ހުރެގެން ލިބޭނެ އިންތިޒާމު ހަމަޖެއްސުމަށް ހިންގޭ މުހިންމު މަޝްރޫއެއް ކަމަށް ޝަރީފް ވިދާޅުވިއެވެ. މިހާތަނަށް ހއ. އަތޮޅާއި، ދ. އަތޮޅާއި، ނ. އަތޮޅާއި، މ. އަތޮޅާއި އަދި ކ. އަތޮޅުގެ މީހުން ދިރިއުޅޭ ހުރިހާ ރަށެއްގައި އޭޓީއެމް ހިދުމަތް ދޭން ވަނީ ފަށާފައެވެ. "މި އަދަދުންވެސް އަޅުގަނޑުމެންގެ މުޖުތަމައުތަކަށް މި ހިދުމަތަކީ ކިހާ މުހިންމު ހިދުމަތެއްކަން ވަރަށް ބޮޑަށް ހާމަވެގެންދޭ" ކަމަށް ޝަރީފް ވިދާޅުވިއެވެ.
