ފިނޭންސް މިނިސްޓްރީން ނެރެފައިވާ ވީކްލީ ފިސްކަލް ޑިވެލޮޕްމަންޓް ރިޕޯޓުގައިވާ ގޮތުން މިމަހުގެ 22 ވަނަ ދުވަހުގެ ނިޔަލަށް ދައުލަތުގެ ބަޖެޓުން ޖުމުލަ 13.7 ބިލިއަން ރުފިޔާ ހަރަދުކޮށްފައިވެއެވެ.
މިއަހަރުގެ ނިޔަލަށް ދައުލަތުން ކޮށްފައިވާ ހަރަދުތަކަށް ބަލާއިރު ރިކަރަންޓް ހަރަދު 3.8 ޕަސަންޓު ދަށްވެފައިވާއިރު، ކެޕިޓަލް ހަރަދު 64.2 ޕަސަންޓަށް ދަށްވެފައިވެއެވެ. އޮފީސް ހިންގުމުގެ ބޭނުމަށް ހޯދާ ތަކެތީގެ ހަރަދު 70.3 ޕަސަންޓު ދަށްވެފައިވާއިރު، މަރާމާތުކުރުމާއި ބެލެހެއްޓުމުގެ ހަރަދު 27.1 ޕަސަންޓު ދަށްވެފައިވެއެވެ. އަދި ދައުލަތުގެ ބަޖެޓުން ދަތުރުފަތުރުކުރުމަށް ކުރެވޭ ހޭދަ ވަނީ މިދިޔަ އަހަރާ އަޅާބަލާއިރު 15.7 ޕަސަންޓު ދަށްވެފައެވެ. އެހެންނަމަވެސް އާސަންދައަށާއި، ހިދުމަތްދިނުމުގެ ބޭނުމަށް ހޯދާ ތަކެއްޗަށާއި، ލޯނުގެ ހިދުމަތަށް ހަރަދުކޮށްފައިވާ މިންވަރު، މިދިޔަ އަހަރާ އަޅާބަލާއިރު އިތުރުވެފައިވެއެވެ.
ރިޕޯޓުގައިވާ ގޮތުން، ކެޕިޓަލް ހަރަދުގެ ގޮތުގައި ދައުލަތުގެ ބަޖެޓުން ހޭދަކޮށްފައިވަނީ 1.4 ބިލިއަން ރުފިޔާއެވެ. އަދި ޕަބްލިކް ސެކްޓަރ އިންވެސްޓްމަންޓް ޕްރޮގްރާމް (ޕީއެސްއައިޕީ) އަށް މިއަހަރުގެ ތެރޭގައި ހަރަދުކޮށްފައިވަނީ 1.4 ބިލިއަން ރުފިޔާއެވެ. އޭގެ ތެރެއިން 801.1 މިލިއަން ރުފިޔާ ހަރަދުކޮށްފައިވަނީ ލަފާފުރުމުގެ ދަތިކަން ހައްލުކުރުމާ ގުޅޭ ތަފާތު މަޝްރޫއުތަކަށެވެ. މިދިޔަ އަހަރު ޕީއެސްއައިޕީ ބަޖެޓުން ގިނަ ހަރަދުތަކެއް ކޮށްފައިވަނީ ބިން ހިއްކުމާއި މަގު ހެދުމުގެ މަޝްރޫއުތަކަށެވެ.
