މިއަދު ބަންޑާރަ ކޮށީގައި ބޭއްވި ހާއްސަ ރަސްމިއްޔާތެއްގައި ވަތަނީ ހިދުމަތުގެ ޕްރޮގްރާމްގެ މުދައްރިބުންނާ ބައްދަލުކުރެއްވުމަށްފަހު ރައީސް ވިދާޅުވީ، މި ޕްރޮގްރާމަކީ ގައުމަށް ވަރަށް މުހިންމު މަޝްރޫއެއް ކަމަށާއި ދިވެހި ޒުވާނުން ގައުމަށް ފައިދާހުރި ބޭނުންތެރި ބަޔަކަށް ހެދުމަށް ޓަކައި ހިންގޭ ވަރަށް މުހިންމު ވަތަނީ މަސައްކަތެއްކަމަށެވެ.
ދިވެހި ވަތަނީ ހިދުމަތުގެ ޕްރޮގްރާމަކީ ރައީސް މުއިއްޒުގެ ހާއްސަ އިސްނެންގެވުމުގެ މަތިން ތަމްރީނާއި ތަރުބިއްޔަތު ލިބިފައިވާ ހަރުދަނާ ޒުވާން ޖީލެއް ބިނާކުރުމަށް އިސްކަންދީގެން ހިންގުމަށް ހަމަޖެހިފައިވާ ސަރުކާރުގެ މުހިންމު ސިޔާސަތެކެވެ.
ރައީސް މުއިއްޒު ދިވެހި ވަތަނީ ހިދުމަތުގެ މުދައްރިބުންނާ ބައްދަލުކުރެއްވުން
މި ޕްރޮގްރާމްގައި ކުރިއަށް އޮތް ހަތަރު އަހަރު ކޮންމެ އަހަރަކު 1000 ފަރާތެއް ތަމްރީނުކުރުމަށް ރާވާފައިވާއިރު މިހާތަނަށް 891 ކުދިން އެޕްލިކޭޝަން ހުށަހަޅާފައިވެއެވެ. މި ޕްރޮގްރާމްގައި ބައިވެރިވާ ކޮންމެ ފަރާތަކަށް އެލަވަންސެއް ދިނުމަށް ސަރުކާރުން ވަނީ ނިންމާފައެވެ.
