ބޮޑު އީދު ދުވަހު ގްރޭޓާ މާލެ ބަސް ހިދުމަތުގެ ދަތުރުތައް ފެށުމަށް ހަމަޖެހިފައިވަނީ ހެނދުނު 8:00 އިން ފެށިގެންނެވެ.
ނަމަވެސް، ދަތުރުވެރިންނަށް ފަސޭހަކޮށްދިނުމުގެ ގޮތުން އީދު ނަމާދުގެ ކުރިން މާލެ އަދި ހުޅުމާލޭގެ ފޭސް އެކެއް އަދި ދެއަކުން ވެލާނާ އިންޓަނޭޝަނަލް އެއާޕޯޓަށް 5:30 އަދި 6:00 ގައި ބަސްތައް ދަތުރުކުރާނެއެވެ. މީގެ އިތުރުން ވިލިމާލޭ ބަސް ހިދުމަތުގެ ދަތުރުތައް 6:00 އިން ފެށިގެން 8:00 ގެ ނިޔަލަށް މެދުކަނޑާލާނެކަމަށް އެމްޓީސީސީން ބުންޏެވެ.
ބޮޑު އީދު ދުވަހު ވިލިމާލެ، ހުޅުމާލެ އަދި ތިލަފުއްޓަށް ފެރީގެ ދަތުރުކުރާ ގަޑިތައްވެސް އެމްޓީސީސީން ވަނީ ހާމަކޮށްފައެވެ. މި ގޮތުން މާލޭން ވިލިމާލެއަށް އީދު ނަމާދުގެ ކުރިން ފަހު ފެރީ ފުރާނީ 6:30 ގައެވެ. އަދި އީދު ނަމާދަށް ފަހު ފަށާ ފުރަތަމަ ފެރީ ފުރާނީ 8:00 ގައެވެ. ހުޅުމާލޭން މާލެއަށް ފުރަތަމަ ދަތުރު ފުރާނީ 14:00 ގައެވެ. އަދި މާލޭން ހުޅުމާލެއަށް ފުރަތަމަ ދަތުރު ފުރާނީ 14:30 ގައެވެ. މީގެ އިތުރުން މާލޭން ތިލަފުއްޓަށް ފުރަތަމަ ދަތުރު ފުރާނީ 8:30 ގައި ކަމަށާއި ތިލަފުށިން މާލެއަށް ފުރަތަމަ ދަތުރު ފުރާނީ 9:00 ގައެވެ.
އެމްޓީސީސީން ފޯރުކޮށްދެމުންދާ ސީއެފްއެން ލަކުޑި ފެރީއާއި އަރުޓީއެލް ފެރީ ދަތުރުތައް ބޮޑު އީދު ދުވަހު ޝެޑިއުލް ކުރެވިފައި ނުވާކަމަށް އެކުންފުނިން ވަނީ ބުނެފައެވެ. އެމްޓީސީސީން ވަނީ މި ދަތުރުތަކާއި ގުޅޭގޮތުން އިތުރު މައުލޫމާތު ހޯއްދެވުމަށް 1650 އަށް ގުޅުމަށް އެދިފައެވެ.
