މި މަޝްރޫއުގެ ލެޓާ އޮފް އެކްސްޗޭންޖުގައި ޗައިނާ ސަރުކާރާއި ރާއްޖެއާ ދެމެދު މިދިޔަ މަހު ފަހުކޮޅު ވަނީ ސޮއިކޮށްފައެވެ.
ލޯކަލް ގަވަމަންޓް މިނިސްޓަރު އާދަމް ޝަރީފް ދައުލަތުގެ މީޑިއާ މެދުވެރިކޮށް ވިދާޅުވީ ކައުންސިލްތަކަށް ބޭނުންވާ ވަސީލަތްތައް ފޯރުކޮށްދިނުމަކީ ސަރުކާރުގެ ވަރަށް ބޮޑު އަމާޒެއް ކަމަށެވެ. އަދި ރައީސް ޑރ. މުހައްމަދު މުއިއްޒު ރަށްރަށަށް ޒިޔާރާތް ކުރެއްވިއިރު ކައުންސިލް އިދާރާތައް ހުރީ ވަރަށް ބޮޑަށް ބާވެ، ބޮލަށް ވެއްޓޭ ވަރަށް ހަލާކުވެފައި ކަމަށެވެ. މިކަމަށް ހައްލެއް ހޯދައިދިނުމަށް ޗައިނާގެ އެހީގައި މި މަޝްރޫއު ކުރިއަށް ގެންދިއުމަށް ނިންމީ ކަމަށް އެ މިނިސްޓަރު ވިދާޅުވިއެވެ.
މި މަޝްރޫއުގެ ދަށުން އެޅުމަށް ހަމަޖެހިފައިވާ 50 ކައުންސިލް އިމާރާތް ޑިޒައިން އެންޑް ބިލްޑް އުސޫލުން ދެ ބާވަތަކަށް ބަހާލައިގެން އެޅުމަށް ވަނީ ހަމަޖެހިފައެވެ. ކޮންސްޓްރަކްޝަން މިނިސްޓްރީން ބުނި ގޮތުގައި ބާވަތް 1 ގެ ދަށުން 30 ކައުންސިލް އިދާރާ އެޅޭނެއެވެ. އަދި ބާވަތް 2 ގެ ދަށުން 20 އިމާރާތް އެޅޭނެއެވެ. މިއީ ޖާގައިގެ ދަތިކަން ކުރިމަތިވެފައިވާ ކައުންސިލް އިދާރާތަކުގެ ޖާގައިގެ މައްސަލަ ހައްލު ކުރުމަށް ޒަމާނީ ފެންވަރަށް އާ އޮފީސް އިމާރާތްކުރުމަށް ހިންގާ މަޝްރޫއެކެވެ.
