މިގޮތުން "އޭ 11" ގޮނޑީގައި އިށީނދެގެން ތިބި ދެ މީހަކު، ގާތްގަނޑަކަށް 27 އަހަރުގެ ފަހުން ހަމަ އެއް ފަދަ ހާދިސާއެއްގައި ސަލާމަތްވުމުން އެކަން ވަނީ މީޑިއާތަކުގެ ސަމާލުކަމަށް އައިސްފައެވެ. މިދިޔަ ހަފުތާގައި އަހުމަދާބާދުން ފުރި ލަންޑަންއަށް ދަތުރުކުރި އެއަރ އިންޑިއާގެ ފްލައިޓް އޭއައި171 ބޯޓު ކާރިސާއިން ދިރި ސަލާމަތްވި ހަމައެކަނި މީހަކީ 11އޭ ގޮނޑީގައި އިށީނދެގެން އިން ވިޝްވާޝް ކުމާރު ރަމޭޝްއެވެ.
މި ޖޫން މަހުގެ 12، ވަނަ ދުވަހު ގައި އިންޑިއާގެ އަހުމަދާބާދުން ފުރި ލަންޑަން ބޮޑުގެއަށް ދަތުރުކުރި ބޯޓުގައި ތިބި 242 މީހުންގެ ތެރެއިން ސަލާމަތްވީ ވިޝްވާޝް ކުމާރު ރަމޭޝް އެކަންޏެވެ.
އެނާގެ ބޯޑިން ޕާސް ބެލުމުން އޭނާ އިށީނދެގެން އިނީ 11އޭ ގޮނޑީގައިކަން ހާމަވެފައިވެއެވެ. ވިޝްވާޝް އިށީނދެގެން އިނީ ބޯޓުގެ އިމަޖެންސީ އެގްޒިޓް ގޮނޑީގައެވެ. ނިއުސްވީކުން ހާމަކުރިގޮތުގައި 40 އަހަރުގެ ބްރިޓިޝް ރައްޔިތެއް ކަމަށްވާ ވިޝްވާޝް ސަލާމަތްވީ ބޯޓުގެ އިމަޖެންސީ އެގްޒިޓުން ބޭރަށް ފުންމާލައިގެންނެވެ. އޭނާއަށް ލިބުނު އަނިޔާތަކާއެކުވެސް ބޯޓު ހާދިސާ ވުމާއެކު ހޮސްޕިޓަލުގައި ފަރުވާ ދޭންޖެހުނެވެ.
މިހާރު އުމުރުން 47 އަހަރުގެ ރުއަންގްސަކް 1998 ގައި ބެންކޮކުން ސުރަތް ތާނީއަށް ދަތުރުކުރި ތައި އެއާވޭސް ފްލައިޓް ޓީޖީ261 ބޯޓުގައި ދަތުރުކުރަނިކޮށް ބޯޓު ވައްޓައިލަން އުޅެނިކޮށް ފެންގަނޑަކަށް ވެއްޓުނެވެ. އެ ބޯޓުގައި ތިބި 146 މީހުންގެ ތެރެއިން 101 މީހުން މަރުވިއެވެ.
ބޯޓުގެ ފަހަތުގައި އިށީނދެގެން ތިބުމަކީ އާންމުކޮށް އެންމެ ރައްކާތެރި ބައިކަމަށް ބެލެވޭއިރު، އެމްއައިޓީގެ އެއަރޮނޯޓިކްސް ޕްރޮފެސަރު ޖޮން ހޭންސްމަން ބުނީ "އާންމުކޮށް ބޯޓު ހާދިސާތަކުގައި ފަހަތުގައި އިށީނދެގެން ތިބުން ރަނގަޅު. އެއީ ކުރިމަތީ ބައި އިމްޕެކްޓް ބާރު އަންނައިރު ޝޮކް އެބްޒޯބަރެއްހެން މަސައްކަތްކުރާތީ." ކަމަށެވެ. އެހެންނަމަވެސް ހޭންސްމަން ބުނީ ބޯޓުގައި ރައްކާތެރި ވަކި ގޮނޑިއެއް ނޯންނަކަމަށެވެ. - ބޯޓުގެ މޮޑެލް އަދި ހާދިސާގެ ބާވަތުން ރައްކާތެރި ގޮނޑި ބަދަލުވާކަމަށް ވެސް އޭނާ ބުންޏެވެ.
އެއާ އިންޑިއާއިން މަޢުލޫމާތު ދިންގޮތުގައި ބޯޓުގައި އެވަގުތު ތިބި 242 މީހުންގެ ތެރެއިން 241 މީހުން ވަނީ މަރުވެފައެވެ. މީގެ އިތުރުން ބޯޓު ޖެހުނު ހިސާބުގައި ހުރި ބީޖޭ މެޑިކަލް ކޮލެޖް އެންޑް ހޮސްޕިޓަލް ވެސް ވަނީ ގެއްލުން ވެފައެވެ.
