މި ގަރާރުގައި މަޖިލިހަށް ހުށައެޅުއްވީ ސަރުކާރު ހިންގާ ޕީއެންސީގެ ބާރަށު ދާއިރާގެ މެމްބަރު އިބްރާހިމް ޝުޖާއުއެވެ.
ރައްޔިތުން މަޖިލީހުގެ މެމްބަރުންގެ ހިޔާލު ހޯދުމަށް ޝުޖާއު ހުށައެޅި ގަރާރުގައި ބުނެފައިވަނީ އިދާރީ ދާއިރާތައް ލާމަރުކަޒީ ނިޒާމުން ހިންގުމަށް ކުރަމުން އަންނަ ހޭދައަކީ ބޮޑު ހޭދައެއްކަމަށެވެ. އަދި އެ ނިޒާމުން އެކަށީގެންވާ ނަތީޖާ ނުނެރޭވޭކަމަށްވެސް ޝުޖާއު ހުށައެޅި ގަރާރުގައިވެއެވެ.
މި ގަރާރުގައި ބުނެފައިވަނީ ލާމަރުކަޒީ ގާނޫނަށް މިދިޔަ 15 އަހަރު ދުވަހުގެ ތެރޭގައި ލޯކަލް ކައުންސިލްގެ ހަތަރު އިންތިހާބު ބާއްވާފައިވާއިރު އެރަކެއް ހާސް ކައުންސިލަރުންނެއް އިންތިހާބުކޮށް އެތަކެއް ބިލިއަން ދިވެހި ރުފިޔާ ވަނީ ދިވެހި ދައުލަތުގެ ބަޖެޓުން މި ނިޒާމަށް ހަރަދުވެފައިވާކަމަށެވެ. އަދި މި ހަރަދު ކުރިއިރު ހިންގުމަށް އައި އިތުރު ބަދަލަކާއި ފަސޭހައެއް ނުވަތަ މި ނިޒާމުގެ ސަބަބުން ރަށްްތަކާއި އަތޮޅުތަކުގެ ތަރައްގީއަށް ގެނެވުނު އިތުރު ބަދަލެއް ފެންނަން ނެތްކަމަށް ޝުޖާއުގެ ގަރާރުގައިވެއެވެ.
ޝުޖާއުގެ ގަރާރުގައި ބުނީ ލާމަރުކަޒީ ނިޒާމަކީ ކޮންމެ ސަރުކާރަކަށް ނިސްބަތްވާ އެކްޓިވިސްޓުންނަށް ޖާގަ ދޭން އޮތްތަނެއްކަމަށެވެ.
ސަރުކާރުގެ ފަރާތުން މި ގަރާރު މަޖިލިހަށް ހުށައަޅާފައި މިވަނީ ކައުންސިލަރުން މަދުކޮށް އަތޮޅު ކައުންސިލްތައް އުވާލަން ނިންމާ އެކަމަށް ބޭނުންވާ އިސްލާހު ގެނައުމަށް މިއަހަރު މަޖިލިހަށް ހުށައަޅުއްވާނެކަމަށް ރައީސް ޑރ. މުހައްމަދު މުއިއްޒު ވިދާޅުވެފައިވަނިކޮށެވެ.
