މިނިސްޓަރު ވިދާޅުވި ގޮތުގައި މި ގާނޫނުގެ ފުރަތަމަ ޑްރާފްޓް މިހާރު ވަނީ ނިމި، ކަމާގުޅޭ ފަރާތްތަކާއެކު މަޝްވަރާކުރެވެމުންނެވެ.
ރާއްޖޭގެ ސިއްހީ ނިޒާމު އިތުރަށް ތަރައްގީކޮށް، ދެވަނަ މަރުހަލާއަކަށް ގެންދިއުމަކީ މުހިންމު ކަމެއް ކަމަށް ފާހަގަކުރައްވަމުން، މިނިސްޓަރު ވިދާޅުވީ ކިޑްނީ ޓްރާންސްޕްލާންޓް ފަދަ އޮޕަރޭޝަންތައް ކުރެވޭނެ ފެންވަރަށް އޮޕަރޭޝަން ތިއޭޓަރުތައް އަޕްގްރޭޑް ކުރުމުގެ މަސައްކަތްތައްވެސް ކުރިއަށްދާ ކަމަށެވެ. މިކަމަށް ބޭނުންވާ ގާނޫނީ ގޮތުން ބަލަންޖެހޭ ކަންތައްތައް ބެލުމަށްޓަކައި ގާނޫނެއް އެކުލަވާލުމަށް މަސައްކަތްކުރަމުންދަނީ ކަމަށްވެސް މިނިސްޓަރު ފާހަގަކުރެއްވިއެވެ.
މި ގާނޫނާ ގުޅޭ މަޝްވަރާތައް ނިމުމުން، އެ ބިލު ރައްޔިތުންގެ މަޖިލީހަށް ހުށަހަޅާނެ ކަމަށް މިނިސްޓަރު ނާޒިމް ވިދާޅުވިއެވެ. އެ ގާނޫނު ފާސްވުމާއެކު ރާއްޖޭގައި ކިޑްނީ ބަދަލުކުރުން ފަދަ އޮޕަރޭޝަންތައް ކުރުމުގެ ގާނޫނީ އިޖުރާއާތުތައް ތަރުތީބުކުރެވިގެންދާނެ ކަމަށްވެސް މިނިސްޓަރު ފާހަގަކުރެއްވިއެވެ. މިފަދަ އޮޕަރޭޝަންތައް ރާއްޖޭގައި ކުރެވުމުން، ރައްޔިތުންނަށް ބޭރަށް ދަތުރުކުރުމުގެ ބުރަ ލުއިވެގެންދާނެއެވެ.
