ރައީސް ނަޝީދު އަލުން އެމްޑީޕީއާ ގުޅިވަޑައިގަތުމާ ގުޅިގެން މަރުހަބާ ކިޔުމަށް ބޭއްވި ޖަލްސާގައި ރައީސް ނަޝީދު ވަނީ ފިނިގޮތަކަށް ރައީސް މުއިއްޒަށް ހަމަލާއެއް ދެއްވާފަ އެވެ. އެ މަނިކުފާނު ވިދާޅުވީ، އެންމެ މުހިންމު އެއް ކަމަކީ ކުރިއަށް އޮތް ލޯކަލް ކައުންސިލް އިންތިޚާބު ކަމަށެވެ.
ނަޝީދު ވިދާޅުވީ، އެ އިންތިޚާބު އެމްޑީޕީން ކާމިޔާބުކުރަން ޖެހޭ ކަމަށެވެ. އަދި، އެ އިންތިހާބުން ރައީސް މުއިއްޒާއި ސަރުކާރު ހިންގާ ޕީއެންސީއަށް ލިބިވަޑައިގަންނަވާނީ އެންމެ 20 އިންސައްތަ ވޯޓު ކަމަށް އެ މަނިކުފާނު ވަނީ ހިސާބު ޖައްސަވައިފަ އެވެ.
ދައުލަތުގެ އިގްތިސާދީ ހާލަތާ ގުޅޭގޮތުން ރައީސް ނަޝީދު ވިދާޅުވީ ލޯނަށް ދައްކަންޖެހޭ އަދަދުތައް ބޮޑެތި ވަމުންދާތީ ރާއްޖެ އޮތީ ނުބައި ހާލަތެއްގައި ކަމަށެވެ. ނަޝީދު ވިދާޅުވިގޮތުގައި، ދިވެހިރާއްޖެ އަލުން އަނބުރާ ދިވެހީންނަށް ހޯދައިދޭން ވެއްޖެ އެވެ. އަދި ވިދާޅުވީ، ރާއްޖޭގައި ތަނަވަސްކަމާ އެކީ އުޅެވޭނެ މަގެއް ހޯދެން ޖެހޭނެ ކަމަށާއި އެ ހާލަތު ރަނގަޅު ކުރެވޭނީ ހަމައެކަނި އެމްޑީޕީއަށް ކަމަށްވެސް ވިދާޅުވި އެވެ.
ރައީސް ނަޝީދު އިތުރަށް ވިދާޅުވީ އެމްޑީޕީއަކީ އަބަދުވެސް ރައްޔިތުންނަށް ސަލާމަތާއި ރައްކާތެރިކަން ހޯދައިދޭނެ ޕާޓީ ކަމަށެވެ. އަދި ވިދާޅުވީ އެ މަނިކުފާނުގެ މުޅި ހަޔާތްޕުޅު ހޭދަ ކުރެއްވީ އެމްޑީޕީއަށްޓަކަ އެވެ.
