މީޑިއާގައި ރިޕޯޓްކޮށްފައިވާ ގޮތުގައި ފްރީ އިކޮނޮމިކް އަދި ފްރީ މޫވްމަންޓް ޒޯނެއް ހެދުމަށް ރާއްޖެ އާއި ލަންކާއާ ދެމެދު ކުރަމުން އަންނަ މަޝްވަރާތައް ހަގީގަތަކަށް ވެއްޖެ ނަމަ އެއީ މި ސަރަހައްދުގައި މިހާތަނަށް ދެ ގައުމަކުން ހަދާ އެންމެ ތާރީހީ އިގްތިސާދީ އެއްބަސްވުމަށް ވެގެން ދާނެ އެވެ.
މި އެއްބަސްވުމުގެ ދަށުން ދެ ގައުމުގެ ރައްޔިތުންނަށް ވިސާ ނުވަތަ ވޯކް ޕާމިޓް ބޭނުންނުކޮށް އެއްގައުމުން އަނެއް ގައުމަށް ގޮސް ދިރިއުޅުމާއި، މަސައްކަތްކުރުމާއި، ކިޔެވުމާއި، މުދާ މިލްކުކުރުމާއި، ވިޔަފާރި ހިންގުމާއި، އާންމު ހިދުމަތްތައް ހޯދުމުގެ ފުރުސަތު ވެސް ލިބޭނެ ކަމަށް ބުނެ ރިޕޯޓްކޮށްފައިވެ އެވެ.
އެ ރިޕޯޓުތައް ދޮގުކުރައްވައި، ސައީދު މިއަދު ވިދާޅުވީ އެއީ، ރަނގަޅު ވާހަކައެއް ނޫން ކަމަށާއި، އެ ފަދަ ކަމެއް ކުރަން ހިޔާލު ވެސް ކޮށްފައި ނުވާ ކަމަށެވެ.
ރަސްމީކޮށް ސައީދު މިފަދައިން ވިދާޅުވިއިރު، މި ރިޕޯޓުތަކާ ގުޅިގެން ލަންކާ ސަރުކާރުން ވެސް އަދި ރަސްމީކޮށް އެއްޗެއް ބުނެފައެއް ނުވެއެވެ.
ލަންކާގެ ރިޕޯޓުތައް ބުނާ ގޮތުން އެއްބަސްވުމާ ގުޅޭ މަޝްވަރާތަކެއް ލަންކާގެ ރައީސް އަނޫރާ ކުމާރަ ޑިސަނަޔަކަ އަންނަ މަހު ރާއްޖެ ވަޑައިގަންނަވާ ދަތުރުގައި ކުރެއްވުމަށް ވެސް ހަމަޖެހިފައިވެ އެވެ. މި ދަތުރުފުޅު ކުރައްވަން ހަމަޖެހިފައި ވަނީ ރާއްޖޭގެ މިނިވަން ދުވަސްކަމަށްވާ ޖުލައި 26އަށް ފަހު އެވެ.
