މި ކޮންފަރެންސް ބޭއްވުމަށް ހަމަޖެހިފައިވަނީ ޖޫން 30 އިން ޖުލައި 3 ގެ ނިޔަލަށް ސްޕެއިންގެ ސެވިލްގައެވެ.
ރައީސް އޮފީހުން ބުނީ ނައިބް ރައީސް މި ކޮންފަރެންސްގެ އިފްތިތާހީ ދަންފަޅީގައި ބައިވެރިވެވަޑައިގެން ޕްލެނަރީ ބައްދަލުވުމުގައި ބަޔާނެއް އިއްވަވާނެ ކަމަށެވެ. އަދި އެމަނިކުފާނު ބައިވެރިވެވަޑައިގަންނަވާ މަސްލަހަތުވެރިންނާއެކު ބާއްވާ ސިންތާތަކުގައި މާލީ އިސްލާހުގެ ރޮނގުން ރާއްޖެއިން ކުރަމުންދާ މަސައްކަތްތަކާ ގުޅޭގޮތުން ވާހަކަފުޅުދައްކަވާނެ ކަމަށްވެސް ވިދާޅުވިއެވެ. ހަމައެއާއެކު ދަރަނި އަދާކުރުމުގެ ދެމެހެއްޓެނިވި އުސޫލުތަކާއި މާލީ ނިޒާމުގައި ޝާމިލްކަން ކަށަވަރުކުރުމުގެ މައްޗަށްވެސް ނައިބް ރައީސް މަޝްވަރާކުރައްވާނެއެވެ.
އެފްއެފްޑީއަކީ މާލީ އިސްލާހާމެދު މަތީ ފަންތީގެ މަޝްވަރާތައް ކުރުމަށް، ސަރުކާރުތަކާއި ބައިނަލްއަގްވާމީ އަދި ސަރަހައްދީ ޖަމިއްޔާތަކާއި މާލީ އަދި ވިޔަފާރީގެ މުއައްސަސާތަކާއި ވިޔަފާރިތަކާއި މަދަނީ ޖަމާއަތްތަކާއި އދގެ ގުނަވަންތައް އެއްފުރާޅެއްގެ ދަށަށް ގެނެސްދޭ މަންސައެކެވެ. މި ދަތުރުފުޅުގައި ނައިބް ރައީސްގެ އަރިހުގައި ސަރުކާރުގެ އިސްވެރިންގެ މައްޗަށް އެކުލެވޭ ވަފުދެއްވެސް ބައިވެރިވެވަޑައިގަންނަވައެވެ.
