ފިނޭންސް މިނިސްޓްރީން އާންމުކޮށްފައިވާ ތަފާސްހިސާބުތަކުން ދައްކާގޮތުގައި މިމަހުގެ 12 ވަނަ ދުވަހުގެ ނިޔަލަށް ގްރީން ޓެކްސްގެ ގޮތުގައި ދައުލަތަށް 976.4 މިލިއަން ރުފިޔާ ލިބިފައިވެއެވެ.
މިއީ މިދިޔަ އަހަރުގެ މި މުއްދަތުގައި ލިބުނު 518 މިލިއަން ރުފިޔާއަށްވުރެ 458 މިލިއަން ރުފިޔާ އިތުރު އަދަދެކެވެ. ރާއްޖޭގައި ތިމާވެށި ހިމާޔަތްކުރުމުގެ އެކި މަސައްކަތްތަކަށް ފައިސާ ހޯދުމަށް ގްރީން ޓެކްސް ނަގަން ފެށީ 2016 ވަނަ އަހަރުގެ އޮކްޓޯބަރު މަހުން ފެށިގެންނެވެ.
ގްރީން ޓެކުހަކީ ރާއްޖޭގައި ހިންގާ ޓޫރިސްޓު ރިޒޯޓުތަކާއި ހޮޓާތަކާއި ގެސްޓްހައުސްތަކުގެ އިތުރުން ޓޫރިސްޓް އުޅަނދުތަކަށް އަންނަ ޓޫރިސްޓުންގެ އަތުން ނެގޭ ޓެކުހެކެވެ. ޓޫރިސްޓް ފެސިލިޓީއެއްގައި ޓޫރިސްޓަކު ހުންނަ ކޮންމެ ދުވަހަކަށް މި ޓެކްސް ނަގާއިރު، އެއީ ތަނަކާ ގުޅިގެން ދުވާލަކަށް 6 ޑޮލަރާއި 12 ޑޮލަރާ ދެމެދުގެ އަދަދެކެވެ. މި ޓެކްސްއިން އިސްތިސްނާވަނީ އުމުރުން ދެ އަހަރު ނުވާ ކުދިން އެކަނިއެވެ.
