މިނިސްޓަރު މުއްތަލިބި މިއަދުި އެކްސްގައި ކުރެއްވި ޕޯސްޓެއްގައި ވަނީ ހަނިމާދޫ އެއާޕޯތްގެ މަސައްކަތް މިހާރު ނިމިފައިވާ ބައެއް ތަންތަނުގެ ފޮޓޯތައް ހިއްސާކޮށްފައެވެ. މިނިސްޓަރު ވިދާޅުވީ ހަނިމާދޫ އެއާޕޯޓް ތަރައްގީކުރުމުގެ މަސައްކަތުގެ 88 އިންސައްތަ މިހާރު ނިމިފައިވާއިރު އެއާޕޯޓުގައި ކުރަންޖެހޭ ކޮންސްޓްރަކްޝަންގެ ހުރިހާ މަސައްކެތެއްވެސް މިހާރު ނިމިފައިވާކަމަށެވެ.
ހަނިމާދޫ އެއާޕޯޓްގެ ޓަވަރު
މީގެއިތުރުން ރަންވޭގެ މަސައްކަތް އެއްކޮށް ނިމިފައިވާއިރު ޓާމިނަލްގެ މަސައްކަތުގެ 83 އިންސައްތަ އަދި ކާގޯ އިމާރާތާއި ބޯޓްތައް ބާއްވާ ހޭންގަރާއި ޓްރަފިކް ކޮންޓްރޯލް ޓަވަރުގެ 96 އިންސައްތަ މަސައްކަތް ނިމިފައިވާކަމަށް މިނިސްޓަރު މުއްތަލިބް ވިދާޅުވިއެވެ. މިހާރު މަސައްކަތްދާ ގޮތުން ކަނޑައެޅިފައިވާގޮތަށް އަންނަ ސެޕްޓެމްބަރު މަހަށް މުޅި އެއާޕޯޓްގެ މަސައްކަތް ނިމެނޭކަން މިނިސްޓަރު މުއްތަލިބު ފާހަގަކުރެއްވިއެވެ.
ހަނިމާދޫ އެއާޕޯޓްގައި ފިއުލް ރައްކާކުރާ ބައި
އިންޑިއާގެ އެގްޒިމް ބޭންކުން ދީފައިވާ 800 މިލިއަން ޑޮލަރުގެ ލައިން އޮފް ކްރެޑިޓްގެ ދަށުން މި މަޝްރޫއަށް 136 މިލިއަން ޑޮލަރު (ދެ ބިލިއަން ރުފިޔާ) ހަރަދުކުރެވޭނެ އެވެ. ހަނިމާދޫ އެއާޕޯޓަކީ މިވަގުތު ރާއްޖޭގައި ހިންގާ އެއާޕޯޓު ތަރައްގީކުރުމުގެ އެންމެ ބިޔަ މަޝްރޫއުތަކުގެ ތެރޭގައި ހިމެނޭ އެއް މަޝްރޫއެވެ. އެންމެ ބޮޑެތި ބޯޓު ވެސް ޖެއްސޭ ގޮތަށް ހަދާފައިވާ އެ އެއާޕޯޓުގެ އާ ރަންވޭގެ މަސައްކަތް މިހާރު ވަނީ އެއްކޮށް ނިމިފައެވެ.
