ނަޝީދު އެކްސްގައި ކުރެއްވި ޕޯސްޓެއްގައި ވިދާޅުވީ، ކޮންކްރިޓް ބިއްލޫރީ އަދި ޕްލާސްޓިކްގައި އަވާގައި ޖެހި، އެއީ ތަރައްގީ ކަމަށް ދެކެނީ ނަމަ އެއީ ހަނި ވިސްނުމެއް ކަމަށެވެ. އަދި ވެލާނާ އެއާޕޯޓްގެ އާ ޓާމިނަލްވެސް ރީތިވާނީ، ވަޅި ރީތީ ކަމަށް ބުނާ މިސާލުގައި ކަމަށްވެސް ނަޝީދު ވިދާޅުވިއެވެ.
ރާއްޖޭގައި މިހާތަނަށް ހިންގި އެންމެ ބޮޑު އެއް މަޝްރޫއު ކަމުގައިވާ އާ ޓާމިނަލްގެ މަސައްކަތް ނިންމައި، އެ ތަން ހުޅުވުމަށް ވާން ޖެހޭ ފަހުގެ ތައްޔާރީތައް އެމްއޭސީއެލް އިން މިހާރު ވަނީ ފަށައިފައެވެ.
އަހަރަކު 7.5 މިލިއަން މީހުންނަށް ހިދުމަތްދެވޭ އާ ޓާމިނަލްގައި 48 ޗެކިން ކައުންޓަރު ހުރެއެވެ. އަދި ފުރާ މީހުންނަށް ހާއްސަކޮށްގެން އިމިގްރޭޝަންގެ 20 ކައުންޓަރާއި، އަންނަ މީހުންނަށް ހާއްސަކޮށް 28 ކައުންޓަރު ހުރެއެވެ. މި ޓާމިނަލްގެ މަސައްކަތް ނިންމަން ސައުދީ ފަންޑުން 100 މިލިއަން ޑޮލަރު (1.5 ބިލިއަން ރުފިޔާ) އާއި އަބޫ ދާބީ ފަންޑް ފޯ ޑިވެލޮޕްމެންޓް (އޭޑީއެފްޑީ) އިން 80 މިލިއަން ޑޮލަރު (1.2 ބިލިއަން ރުފިޔާ) ވަނީ ހޯދައިފައެވެ. ޓާމިނަލްގެ މަޝްރޫއު ނިމޭއިރު، ނުވަ ބިލިއަނެއްހާ ރުފިޔާ އަރާނެ ކަމަށް ބެލެވެއެވެ.
