ސިވިލް ސާވިސް ކޮމިޝަނުން ދައުރު ހަމަވާ މެންބަރުންނަކީ ކޮމިޝަނުގެ ރައީސް، މުހައްމަދު ނާސިހާއި، މުހައްމަދު ފަރުޝަތުގެ އިތުރުން، ފާތިމަތު ޝަރީފެވެ. މި ތިން ބޭފުޅުންވެސް ކޮމިޝަނަށް އައްޔަނުކުރީ 2020 ވަނަ އަހަރުގެ ސެޕްޓެންބަރު މަހުގެ ތިންވަނަ ދުވަހެވެ. މި އަހަރުގެ ސެޕްޓެންބަރު ތިންވަނަ ދުވަހަށް މި ބޭފުޅުންގެ ދައުރު ހަމަވާނެއެވެ.
ރައީސް އޮފީހުން ބުނީ ސިވިލް ސާވިސް ކޮމިޝަންގެ މެމްބަރުކަމަށް ކުރިމަތިލުމުގެ ފުރުސަަތު މިއަދުން ފެށިގެން އަންނަ މަހުގެ 12 ވާ އަންގާރަ ދުވަހުގެ 12:00 ގެ ނިޔަލަށް ހުޅުވާލާފައިވާކަމަށެވެ.
މަގާމަށް އެދި ހުށަހަޅާ ފޯމު ބަލައިގަތުމަށް ހަމަޖެހިފައިވަނީ، ރަސްމީ ބަންދު ދުވަސްތައް ފިޔަވައި އެހެން ދުވަސްދުވަހުގެ ހެނދުނު 08:30 އިން 12:00 އަށް ރައީސް އޮފީހުންނެވެ.
ސިވިލް ސާވިސް ކޮމިޝަނުގެ މެންބަރުކަމަށް ކުރިމަތިލުމަށް އެދޭ ފޯމު ރައީސުލްޖުމްހޫރިއްޔާގެ އޮފީހުގެ ވެބްސައިޓުން ޑައުންލޯޑް ކުރެއްވޭނެކަމަށްވެސް ރައީސް އޮފީހުން ބުނެއެވެ.
