ހާއްސަ ދަންމަރަކާއެކު އެ ދުވުން ފެށިއިރު، އެމްޑީޕީން ބުނެފައިވަނީ، އެއީ އެމްޑީޕީން ވޭތުވެދިޔަ 20 އަހަރު ދިވެހިންނަށާއި ރާއްޖެ އަށް ކޮށްދީފައިވާ އެކިއެކި ހިދުމަތްތައް އަދި ގެނެސްދީފައިވާ ތަރައްގީ ރަމްޒު ކޮށްދޭނެ ދަންމަރެއް ކަމަށެވެ.
އެ ދުވުމުގައި އެ ޕާޓީގެ ގިނަ އަދަދެއްގެ އަންހެން މެންބަރުން ވެސް ހިމެނޭހެން 300 އެއްހާ މީހުން ބައިވެރިވެފައިވެ އެވެ.
އެމްޑީޕީގެ ޗެއާޕާސަންގެ ނައިބު އިބްރާހިމް ވަހީދު ވިދާޅުވި ގޮތުގައި، މިއަދުގެ ހަރަކާތާ އެކު، ކުރިއަށް އޮތް ލޯކަލް ކައުންސިލް އިންތިހާބު އެ ޕާޓީން ކާމިޔާބު ކުރުމުގެ މަސައްކަތް އެ ފެށީ އެވެ. އަދި އެ އިންތިހާބު "ބޮޑުތަނުން ނަގަން" އެ ޕާޓީން ބޭނުންވާ ކަމަށް ވިދާޅުވި އެވެ.
މި ހަރަކާތް އެންމެ ފުރަތަމަ ބާއްވަން އެމްޑީޕީން ނިންމީ މިދިޔަ މަހުގެ 18ގައެވެ. ނަމަވެސް، ހުޅުމާލެ ސެންޓްރަލް ޕާކުގައި ސިޔާސީ ހަރަކާތްތައް ކުރިއަށް ނުގެންދެވޭނެ ކަމަށް ބުނެ، ހުއްދަ ދީފައިނުވުމުގެ ސަބަބުން އެ ދުވުން މާލޭ މަޖީދީ މަގުގައި މިދިޔަ މަހުގެ 25ގައި ބޭއްވުމަށް ނިންމިއެވެ.
އެ ނިންމުން ބަދަލުކުރީ މިއަދު ސެންޓްރަލް ޕާކުގައި ދުވުން ބޭއްވުމަށް ފުލުހުން ހަމަޖައްސައިދިނުމުންނެވެ
