މަސްތުވާތަކެތި އެތެރެކުރުމުގެ ނުވަތަ ވިޔަފާރިކުރުމުގެ ކުށް ސާބިތުވާ ފަރާތްތަކަށް މަރުގެ އަދަބު ދިނުން، ރައްޔިތުންގެ މަޖިލީހަށް މިހާރު ހުށަހަޅާފައިވާ މަސްތުވާ ތަކެއްޗާބެހޭ ގާނޫނުގައި ހިމެނުމަށް ރައީސް ޑރ. މުހައްމަދު މުއިއްޒު ދާދިފަހުން ވަނީ ކަމާބެހޭ ފަރާތްތަކަށް އަންގަވާފަ އެވެ.
އެކަމާ ގުޅިގެން އެމްނެސްޓީ އިންޓަނޭޝަނަލް އާއި ހިއުމަން ރައިޓްސް ވޮޗް ހިމެނޭ ގޮތަށް ނުވަ ޖަމިއްޔާއަކުން ނެރުނު ބަޔާނެއްގައި ބުނީ މަރުގެ އަދަބު އެއްވެސް ހާލަތަކާ ގުޅިގެން ދިނުމަކީ އެ ޖަމިއްޔާތަކުން ދެކޮޅު ހަދާކަމެއް ކަމަށާއި މަރުގެ އަދަބު ދިނުމަށް ސަރުކާރާއި މަޖިލީހުން ވެސް ކުރަމުން އަންނަ މަސައްކަތް ހުއްޓާލުމަށް ގޮވާލާ ކަމަށެވެ.
މަރުގެ އަދަބު ދިނުމަކީ އިންސާނީ ހައްގުތަކާ ހިލާފު ކަމެއް ކަމަށާއި މަރުގެ އަދަބު ދޭން ހުކުމްކޮށްފައިވާ މީހުންގެ ހުކުމް ލުއިކޮށްދިނުމަށް ވެސް ވަނީ ގޮވާލާފަ އެވެ.
ބަޔާނުގައި ބުނީ މަސްތުވާތަކެއްޗާ ދެކޮޅަށް މުޖުތަމައުގެ ހަމަޖެހުމަށް ކަމަށް ބުނެ މަރުގެ އަދަބު ތަންފީޒުކުރުމަކީ މުށްބާރު ހަރުކަށި އުސޫލުތައް ގެންގެޅޭ ގައުމުތަކުގެ ސިޔާސަތުތައް ކުރިއެރުވުން ކަމަށާއި އެއީ އިންސާނީ ހައްގުތަކަށް އަރައިގަތުމުގެ ސަގާފަތެއް ކުރިއެރުވުން ކަމަށެވެ.
ޖަމިއްޔާތަކުން ބުނީ މަސްތުވާތަކެއްޗާ ގުޅުންހުރި ކުށްތަކަށް މަރުގެ އަދަބު ތައާރަފުކުރުމަކީ މިހާރު ވެސް ކަންބޮޑުވާންޖެހޭ ވަރަށް ހުރި ރާއްޖޭގެ އިންސާނީ ހައްގުތަކަށް އިހުތިރާމް ނުކުރުމުގެ މައްސަލަތައް އިތުރުވެގެންދާނެ ކަމެއް ކަމަށެވެ.
މަސްތުވާތަކެއްޗާ ބެހޭ ގާާނޫނަށް އިސްލާހު ގެނައުމުގެ ބިލް ސަރުކާރުން މިދިޔަ އަހަރުގެ ފަހުކޮޅު ރައްޔިތުންގެ މަޖިލިހަށް ފޮނުވާފައިވާއިރު އެ ބިލް މިހާރު އޮތީ ދިރާސާ ކުރުމަށް ކަމާ ގުޅޭ ކޮމިޓީގަ އެވެ.
