ފުލުހުން ބުނީ އިމާރާތުން ބައިތަކެއް ވެއްޓުނު މައުލޫމާތު މިއަދު 13:00 ހާއިރު ލިބުނު ކަމަށެވެ. އަދި މިހާރު މައްސަލަ ތަހުގީގުކުރަމުން އަންނަ ކަމަށް ފުލުހުން ބުންޏެވެ.
އަމީނީ މަގުގައި ހުންނަ އީޑީސީ އިމާރާތުން ބައިތަކެއް ވެއްޓުމާ ގުޅިގެން ޖެހިގެން ހުރި އިމާރާތަކަށާއި، އެ ސަރަހައްދުގައި ޕާކުކޮށްފައި ހުރި ދެ ސައިކަލަކާއި ދެ ކާރަކަށް ގެއްލުންތައް ލިބިފައިވާ ކަމަށް ފުލުހުން ހާމަކުރިއެވެ. އަދި އެ ހާދިސާގައި އެއްވެސް މީހަކަށް އަނިޔާއެއް ލިބިފައިނުވާ ކަމަށްވެސް ފުލުހުން ބުންޏެވެ.
މާލޭގައި އެތައް އަހަރެއް ވަންދެން ބޭނުންނުކޮށް، ރެނދުލައި، ގެއްލުންތައް ލިބިފައިވާ އިމާރާތްތައް ހުރިކަން ފާހަގަކުރެވެއެވެ. މިހާރު ކޮންކްރީޓް ބައިތައް ވެއްޓުނު އިމާރާތަކީ ބޭނުންނުކުރާ އިމާރާތެއް ކަމަށް ފުލުހުން ބުންޏެވެ. އަދި ފުލުހުން ބުނެފައިވަނީ، އެ ހާދިސާއާ ގުޅޭ މައުލޫމާތު ކަމާ ގުޅުންހުރި އިދާރާތަކާ ހިއްސާކޮށް މައްސަލަ ބަލަމުން އަންނަ ކަމަށެވެ.
