އާތިފް މިހެން ވިދާޅުވީ، ރައީސް ޑރ. މުހައްމަދު މުއިއްޒު އެ ސިޓީއަށް ކުރެއްވި ދަތުރުފުޅުގައި ރައްޔިތުންނާ ބައްދަލުކުރެއްވުމަށް ބޭއްވި ޖަލްސާގައި ވާހަކަފުޅު ދައްކަވަމުންނެވެ. މީގެ ކުރިން ކައުންސިލަށް ލިބޭ އާމްދަނީ ތިން މިލިއަނުން 13 މިލިއަން ރުފިޔާއަށް އިތުރުވެފައިވާ ކަމަށް އާތިފް ފާހަގަކުރެއްވިއެވެ.
މި ޖަލްސާގައި ރައީސް މުއިއްޒު ވަނީ ގާނޫނަށް ގެނައި އިސްލާހުތައް ދިފާއު ކުރައްވައި ވާހަކަފުޅު ދައްކަވާފައެވެ. ރައީސް ވިދާޅުވީ، އެމަނިކުފާނު މާލޭގެ މޭޔަރަކަށް ހުންނެވި ދުވަސްވަރު ކުރީގެ ސަރުކާރުން ދިމާކުރި ގޮންޖެހުންތައް ހަނދާނުގައި ހުރުމުން، މި ސަރުކާރުން ކައުންސިލްތަކަށް ދަތިވާނެ ފަދަ އެއްވެސް ކަމެއް ނުކުރާނެ ކަމަށެވެ. އަދި އިސްލާހުތަކާ ގުޅިގެން ޝަކުވާ ކުރަނީ ސިޔާސީ މަގުސަދެއް ހާސިލްކުރަން ބޭނުންވާ ބައެއް ކައުންސިލްތަކުން ކަމަށްވެސް ރައީސް ވިދާޅުވިއެވެ.
ނަމަވެސް މޭޔަރު އާތިފް ވަނީ އެ ވާހަކަތަކަށް ރައްދު ދެއްވައި، އިސްލާހުތަކުގެ ސަބަބުން ދިމާވެފައިވާ ހަގީގީ ގޮންޖެހުންތައް ފާހަގަކުރައްވާފައެވެ. އާތިފް ވިދާޅުވި ގޮތުގައި، ކައުންސିލްގެ ދައުރުގެ ފަހު އަހަރު މުވައްޒަފުން ނެގުމާއި ބިން ކުއްޔަށް ދިނުން ފަދަ ކަންކަމަށް ސަރުކާރުގެ ހުއްދަ ހޯދަންޖެހުމުން ގިނަ ހިދުމަތްތަކެއް ވަނީ ހުއްޓިފައެވެ. އެގޮތުން، މުވައްޒަފަކު ވަކިވުމުން އޭނާގެ ބަދަލުގައި މުވައްޒަފަކު ނުނެގޭނެ ކަމަށް ސިވިލް ސާވިސް ކޮމިޝަނުން އަންގާފައިވާ ކަމަށާއި، ކައުންސިލުން ހުޅުވި ނޮލެޖް ސެންޓަރަށް ބޭނުންވާ މުވައްޒަފުން ނުނެގިވިފައިވާ ކަމަށްވެސް ވިދާޅުވިއެވެ. މީގެ އިތުރުން، ކައުންސިލްތަކަށް ވިޔަފާރި ނުކުރެވޭ ގޮތަށް ހެދުމުން، ރައްޔިތުންނަށް ހެޔޮ އަގެއްގައި ހިދުމަތް ދިނުމަށް ރާވާފައިވާ ބައެއް މަޝްރޫއުތައްވެސް ހުއްޓިފައިވާ ކަމަށް އާތިފް ވިދާޅުވިއެވެ.
