ރާއްޖޭގެ ފަތުރުވެރިކަން ފަށާ ފުޅާކުރުމުގެ އިސްކޮށް އުޅުއްވި އެއް ބާނީ، މޯލްޑިވްސް އެސޯސިއޭޝަން އޮފް ޓޫރިޒަމް އިންޑަސްޓްރީ (މަޓީ)ގެ ޗެއާމަން މުހައްމަދު އުމަރު މަނިކު އުމުރުން 78 އަހަރު ފުޅުގައި މިއަދު ވަނީ އަވަހާރަވެފައެވެ.
މުހައްމަދު އުމަރު މަނިކު އަވަހާރަވީ މިއަދު ހެނދުނުގެ ވަގުތެއްގައެވެ. މުހައްމަދު އުމަރު މަނިކު އަވަހާރަވީ ސިއްހީ ހާލު ވަރަށް ބޮޑަށް ދެރަވެ، ސިންގަޕޫރުގެ މައުންޓް އެލިޒަބެތު ހޮސްޕިޓަލުގައި ފަރުވާ ހޯއްދަވަމުން ގެންދަވަނިކޮށެވެ.
އެމްޔޫ މަނިކު އަވަހާރަވުމުން ކުރީގެ ރައީސް އިބްރާހިމް މުހައްމަދު ސާލިހް ވަނީ އެ އާއިލާއަށް ތައުޒިޔާ ވިދަޅުވެފައެވެ. އެކްސްގައި ކުރެއްވި ޕޯސްޓެއްގައި ރައީސް ސާލިހް ވިދާޅުވީ ދިވެހިރާއްޖެއަށް ފަތުރުވެރިކަން ތައާރަފްކޮށް އަދި ޒަމާނީ ކުރިއެރުންތައް ގެނެސްދެއްވި އެއް ބާނީ ކަމުގައިވާ ނިޝާން މުލީގޭ ޝަރަފުގެ އިއްޒަތުގެވެރި މުހައްމަދު އުމަރު މަނިކު (އެމްޔޫ މަނިކު) އަވަހާރަވި ހަބަރު އެއްސެވީ ނުހަނު ފުން ހިތާމަޔާއެކުކަމަށެވެ.
އެމްޔޫ މަނިކަކީ ފަތުރުވެރިކަމުގެ ސިނާޢަތް ކުރިއެރުވުމަށް ގިނަ ހިދުމަތްތަކެއް ކުރެއްވުމުގެ އިތުރުން ދިވެހި ދައުލަތަށާއި މީހުން ބިނާކުރުމަށްވެސް ގިނަ ހިދުމަތްތަކެއް ކޮށްދެއްވި ބޭފުޅެއްކަން ރައީސް ސާލީހް ވަނީ ފާހަގަކުރައްވާފައެވެ.
ޔުނިވާސަލް އެންޓަޕްރައިސަސް އިން ނެރުނު ބަޔާނެއްގައި ބުނީ، އެ ކުންފުނީގެ ޗެއާމަން އެމްޔޫ މުހައްމަދު އުމަރު މަނިކު އަވަހާރަވީ ސިންގަޕޫރް ގަޑިން މިއަދު ހެނދުނު 6:30 ގައި ކަމަށެވެ. އުމަރު މަނިކު އަވަހާރަވިއިރު އަނބިކަނބަލަކާއި ދެ ބޭފުޅުން ދުނިޔޭގައި އެބަ ތިއްބެވި އެވެ.
ފަތުރުވެރިކަމުގެ ދާއިރާއަށް މުހައްމަދު އުމަރު މަނިކު ކޮށްދެއްވައިފައިވާ ހިދުމަތްތައް ފާހަގަކޮށް ސަރުކާރުން ވަނީ މުހައްމަދު އުމަރު މަނިކަށް ފަތުރުވެރިކަމުގެ ދާއިރާއިން 1982 ވަނަ އަހަރު އަންމު ހިދްމަތުގެ ހިތްވަރު ދިނުމުގެ އިނާމު އަރުވާފައެވެ. އަދި އެ ރޮނގުން ޝަރަފުވެރި ކަމުގެ އިނާމު 2002 ވަނަ އަހަރު ވަނީ ލިބިވަޑައިގެންފައެވެ. އޭގެއިތުރުން، މިނިވަން 25ގެ ޢާންމު ހިދްމަތުގެ އިނާމުވެސް ވަނީ އުމަރު މަނިކަށް ލިބިވަޑައިގެންފައެވެ. އަދި 2011 ވަނަ އަހަރު ދައުލަތުން ވަނީ މުހައްމަދު އުމަރު މަނިކަށް ނިޝާން މުލީގޭ ޝަރަފުގެ އިއްޒަތް (ނ.މ.ޝ.ޢ) އަރުވާފައެވެ.
