އެމްޑީޕީން މިހެން ބުނެފައިވަނީ މުހައްމަދު އުމަރު މަނިކު (އެމްޔޫ މަނިކު)ގެ އާއިލާ އަށް ތައުޒިޔާ ކިޔުމުގެ ގޮތުން އެ ޕާޓީން ނެރުން ބަޔާނެއްގައި އެވެ.
އެމްޑީޕީން ނެރުން ބަޔާނުގައި ވާގޮތުން ދިވެހި ރާއްޖޭގެ ތާރީހު ބައްދަލުކޮށްދެއްވާ ރާއްޖެ އަކީ ދުނިޔެގެ ފެންވަރުގެ ފަތުރުވެރިކަމުގެ މަންޒިލެއް ކަމުގައި ހެއްދެވި އެއް ބާނީ ކަމުގައިވާ ނިޝާން މުލީގެ އިއްޒަތްތެރި ވެރިޔާ ކަމުގައިވާ މުހައްމަދު އުމަރު މަނިކު ނިޔާވިކަމުގެ ހަބަރު އެހީ ވަރަށް ފުންހިތާމަ އާއި އެކުގައި ކަމަށާއި އެހިތާމާއިގައި ބައިވެރިވެ އެ މަނިކުފާނުގެ އާއިލާ އަށް ތައުޒިއްޔާ ކިޔާކަމަށް އެ ބަޔާނުގައިވެ އެވެ.
ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހްގެ އަރިހުގައި ޔުނިވާސަލް ގުރޫޕްގެ ޗެއާމަން މުހައްމަދު އުމަރު މަނިކު -- ފޮޓޯ: ރައީސް އޮފީސް
އެމްޔޫމަނިކު އަކީ ރާއްޖެ މުޅި ދުނިޔެ އަށް ހުޅުވާލައި މި ގައުމަށް ލިބިފައިވާ ގުދުރަތީ މުއްސަނދިކަމުން ނަފާ ހޯދޭނެކަން ސާބިތު ކޮށްދިއްވި ވިޝަނަރީ ލީޑަރެއް ކަމަށް ފާހަގަ ކުރަމުން އެމްޑީޕީން ބުނީ ފަގީރު ގައުމުތަކުގެ ލިސްޓުން ރާއްޖެގެ ނަން އުނިވެ ތަރައްގީ ވަމުން އަންނަ ގައުމުގެ ލިސްޓަށް ރާއްޖެގެ ނަން އައީ މަނިކާއި އަދި އެހެންވެސް މަދު ބޭފުޅުންތަކެއް އިސްވެ ފެއްޓެވި މަސައްކަތުން ކަމަށެވެ.
އެމްޑީޕީން ނެރުން ނޫސް ބަޔާނުގައި އިތުރަށް ވާގޮތުން ފައިތުވެދިޔަ ބައި ގަރުނުގައި ރާއްޖޭގެ އިގްތިސާދަށް އައި ހަލުވި ކުރިއެރުމުގެ އަސްލަކީ އެ ބޭފުޅުން ކުރެއްވި މިންނެތް މަސައްކަތް ކަމަށާއި ރާއްޖޭގެ ޑިމޮކްރަސީ އިސްލާހުކޮށް ހަމަ މަގަށް އެޅުވުމަށް މަނިކު ވަނީ އެކި ގޮތްގޮތުން އެހީތެރިކަން ފޯރުކޮށްދީފައި ކަމަށެވެ.
މުހައްމަދު އުމަރު މަނިކަށް ނިޝާން މުލީގޭ ޝަރަފުގެ އިއްޒަތް އެރުވުމުގެ ތެރެއިން
އެމްޑީޕީން އިތުރަށް ބުނެފައި ވަނީ އެ މަނިކުފާނުގެ ގައުމީ ހިދުމަތްތައް ދިވެހި ތާރީހުގައި ފަވާލެވޭނީ ރަން އަކުރުން ކަމުގަ އެވެ.
އެމްޑީޕީން ވަނީ މިހިތާމަވެރި ދަނޑިވަޅުގައި އެ މަނިކުފާނުގެ އާއިލާ އަށް ކެތްތެރިކަން ދެއްވާ އެ މަނިކުފާނުގެ ފުރާނަ އަށް ސުވާރުގޭގެ ދާއިމީ ނިއުމަތް މިންވަރު ކުރެއްވުމަށް ދުއާ ކުރާކަމަށް ބުނެފައި އެވެ.
ރިސޯޓުތައް ހިންގާ ރާއްޖޭގެ އެންމެ ބޮޑު އެއް ކުންފުނި ކަމަށްވާ ޔުނިވާސަލް އެންޓަޕްރައިސަސްގެ ޗެއާމަން އެމްޔޫ މަނިކް އަވަހާރަވީ ސިންގަޕޫރުގެ މައުންޓް އެލިޒަބެތު ހޮސްޕިޓަލުގައި މިއަދު އެ ގައުމުގެ ގަޑިން 6:30ގައެވެ. އަވަހާރަވީއިރު އުމުރުފުޅުން 78 އަހަރެވެ.
އެމްޔޫ މަނިކްގެ ޣައިބަށް ކުރެވޭ ކަށުނަމާދު އޮންނާނީ މިއަދު އަސްރު ނަމާދަށް ފަހު، އިސްލާމީ މަރުކަޒުގަ އެވެ.
އެމްޔޫ މަނިކް ވަނީ 1972ގައި ރާއްޖެއަށް ފުރަތަމަ ފަތުރުވެރިން ގެނައުމުގެ އިންތިޒާމުތައް ހަމަޖެއްސުމުގައި ފުރަތަމަ ރިސޯޓު ތަރައްގީ ކުރެއްވުމުގައި އިސް ދައުރެއް އަދާކުރައްވައިފައެވެ. މީގެ އިތުރުން، 19 އަހަރަށްވުރެ ދިގު މުއްދަތެއްގައި ސަރުކާރަށް ވެސް އިޚުލާސްތެރި ހިދުމަތްތަކެއް ކޮށްދެއްވާފައިވެ އެވެ.
އެމްޔޫ މަނިކް އަވަހާރަވީއިރު އަނބިކަނބަލުންނާއި ދެ ބޭފުޅުން ދުނިޔޭގައި އެބަތިއްބެވި އެވެ.
