މިއީ އދ. ގެ ތިމާވެށީގެ ޕްރޮގްރާމް (ޔޫއެންއީޕީ) އާއި ދިވެހި ސަރުކާރު ގުޅިގެން ކުރިއަށް ގެންދާ މަޝްރޫއެކެވެ. ގްރީން ކްލައިމެޓް ފަންޑް (ޖީސީއެފް) އިން ފަންޑުކުރާ މި މަޝްރޫއު ފައްޓަވައިދެއްވިކަން އިއުލާންކުރެއްވީ އެންވަޔަރަމެންޓް އެންޑް ޓޫރިޒަމް މިނިސްޓަރު ތޯރިގު އިބުރާހިމް، ފިޖީގައި ކުރިއަށްދާ އޭޕެކް އެންވަޔަރަމެންޓް ފޯރަމްގަ އެވެ.
މި ފޯރަމުގައި ވާހަކަ ދައްކަވަމުން މިނިސްޓަރު ތޯރިގު ވިދާޅުވީ، އޭޝިއާ-ޕެސިފިކް ސަރަހައްދަކީ މޫސުމީ ބަދަލުތަކުގެ ނާޒުކުކަން އެންމެ ބޮޑު އެއް ސަރަހައްދު ނަމަވެސް، ތިމާވެށީގެ ދާއިރާއިން އިސްނަގައި، އެހެން ގައުމުތަކަށް ނަމޫނާ ދެއްކުމުގެ ފުރުސަތު އެބައޮތް ކަމަށެވެ. އެގޮތުން، ސަރަހައްދީ ގައުމުތައް ގުޅިގެން މަސައްކަތްކޮށް، އެއްބާރުލުން އިތުރުކުރުމަށް މިނިސްޓަރު ވަނީ ގޮވާލައްވާފަ އެވެ. ރާއްޖެފަދަ ކުދި ޖަޒީރާ ގައުމުތަކަށް މިފަދަ މަޝްރޫއުތަކުގެ މުހިންމުކަން ފާހަގަކުރައްވަމުން މިނިސްޓަރު ވިދާޅުވީ، މިއީ ރާއްޖޭގެ ތިމާވެށި ރައްކާތެރިކޮށް، ރައްޔިތުންގެ ސަލާމަތްތެރިކަން ކަށަވަރުކުރުމަށް ލިބިގެންދާ ވަރަށް ބޮޑު ބާރެއް ކަމަށެވެ.
