މި ބަދަލު ގެނެސްފައިވަނީ އަމިއްލައަށް ދަތުރުތައް އިންތިޒާމުކޮށްގެން ރާއްޖެ އަންނަ ޓޫރިސްޓުންނަށެވެ.
މޯލްޑިވިއަން ހިންގާ ކުންފުނި، އައިލެންޑް އޭވިއޭޝަނުން ނެރުނު ބަޔާނެއްގައި ބުނީ މި ލުޔު ހާއްސަކޮށްފައިވަނީ ޓުއާ އޮޕަރޭޓަރެއްގެ އެހީއާ ނުލައި ރާއްޖޭގެ ރަށްރަށަށް ދަތުރުކޮށް ގެސްޓްހައުސް ޓޫރިޒަމް ތަޖުރިބާކުރާ 'ފްރީ އިންޑިޕެންޑެންޓް ޓްރެވެލާޒް' އިންނަށް ކަމަށެވެ. މިއީ ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ވައުދުފުޅާ އެއްގޮތަށް، ރަށު ޓޫރިޒަމް ކުރިއެރުވުމަށް އެޅި މުހިންމު ފިޔަވަޅެއް ކަމަށްވެސް އެ ކުންފުނިން ފާހަގަކުރެއެވެ.
މި އަގުހެޔޮކުރުމުގެ ސަބަބުން ރާއްޖޭގެ ރަށްރަށަށް އަންނަ ޓޫރިސްޓުންގެ އަދަދު އިތުރުވެ، ގެސްޓްހައުސް ވިޔަފާރިއަށް އާ ދިރުމެއް ލިބިގެންދާނެ ކަމަށް އައިލެންޑް އޭވިއޭޝަނުން އުއްމީދުކުރެއެވެ. ސަރުކާރުންވެސް ދަނީ ރަށު ޓޫރިޒަމް ފުޅާކުރުމަށް ހާއްސަ ސަމާލުކަމެއް ދީގެން މަސައްކަތް ކުރަމުންނެވެ. ރާއްޖޭގެ 17 ސަރަހައްދަކަށް ދަތުރުކުރާ މޯލްޑިވިއަންގެ މި ފިޔަވަޅަކީ މި މަސައްކަތަށް ލިބުނު އިތުރު ހިތްވަރެކެވެ.
