މިއީ ރާއްޖޭގެ އިލްމީ ދާއިރާ ތަރައްގީކުރުމަށް ސައުދީ އަރަބިއްޔާއިން ދެއްވި ދީލަތި އެހީއެކެވެ.
މިކަމަށްޓަކައި އިސްލާމީ މަރުކަޒުގައި ބޭއްވި ހާއްސަ ރަސްމިއްޔާތެއްގައި، އެ ޔުނިވަރސިޓީގެ ފަރާތުން ފޮތްތައް ހަވާލުކޮށްދެއްވީ ރާއްޖެއަށް ކަނޑައަޅުއްވާފައި ހުންނަވާ ސައުދީ ސަފީރު ހިޒް އެކްސެލަންސީ ޔަހްޔާ ހަސަން އަލްގަހްތާނީ އާއި އެ ޔުނިވަރސިޓީގެ ޑިރެކްޓަރު ހިޒް އެކްސެލަންސީ ޑރ. ސާލިހް ބިން ސުލައިމާން އަލް އަރަޖާއެވެ.
އިސްލާމީ ކަންތައްތަކާ ބެހޭ މިނިސްޓަރު ޑރ. މުހައްމަދު ޝަހީމް އަލީ ސައީދު، މިނިސްޓްރީގެ ފަރާތުން އެ ފޮތްތަކާއި ހަވާލުވެވަޑައިގަތެވެ.
މިނިސްޓަރު ޝަހީމް އިތުރަށް ވިދާޅުވީ، އިމާމް މުހައްމަދު ބިން ސައޫދު އިސްލާމިކް ޔުނިވަރސިޓީއަށާއި، އެ ޔުނިވަރސިޓީގެ ފަރާތުން ރާއްޖޭގައި ގާއިމްކޮށްފައިވާ އިންސްޓިޓިއުޓް އޮފް އިސްލާމިކް އެންޑް އަރަބިކް ސައިންސްއިން މި އަގުހުރި ހަދިޔާއަށްޓަކައި އިހްލާސްތެރި ޝުކުރާއި ތައުރީފު ދަންނަވާ ކަމަށެވެ.
ސައުދީ ސަރުކާރުން ރާއްޖެއާއި މެދު ބަހައްޓަވާ ގާތްކަމަށްޓަކައި، ސައުދީ ރަސްގެފާނު ސަލްމާން ބިން އަބްދުލްއަޒީޒްއަށާއި ވަލީއަހުދު މުހައްމަދު ބިން ސަލްމާނަށް އަދި ސައުދީ ސަރުކާރަށާއި ރާއްޖޭގައި ހުންނަ ސައުދީ އެމްބަސީގެ އިސްވެރިންނަށް ވެސް މިނިސްޓަރު ޝުކުރު އަދާކުރެއްވިއެވެ. މި ރަސްމިއްޔާތުގައި އިސްލާމީ ކަންތައްތަކާ ބެހޭ މިނިސްޓްރީގެ ފަރާތުން ހާއްސަ ހަނދާނީ ލިޔުމެއް އެ ޔުނިވަރސިޓީއަށް ވަނީ އަރުވާފައެވެ.
