އެމަނިކުފާނު މިހެން ވިދާޅުވީ ގަތަރުގައި މިހާރު ކުރިއަށްދާ އަރަބި އިސްލާމީ ގަމުތަކުގެ ކުއްލި ބައްދަލުވުމުގައި ބައިވެރިވެވަޑައިގެން ދެއްވި ބަޔާނުގައެވެ.
ގަތަރުގެ ދޯހާގައި ކުރިއަށްދާ އަރަބި-އިސްލާމިކް ސަމިޓްގެ ކުއްލި ބައްދަލުވުމުގައި ވާހަަކަދައްކަވަމުން ރައީސް ވިދާޅުވީ، ގަތަރަށް ދިން ހަމަލާއަކީ އެންމެންނަށް ދިން ހަމަލާއެއް ކަމަަށެވެ. އަދި ގަތަރުގެ ސިޔާދަތާއި ސަލާމަތާއި ރައްކާތެރިކަން ގުޅިފައިވަނީ މިއަދު ގަތަރު ތަމްސީލުކުރާ ކޮންމެ ގައުމެއްގެ ސިޔާދަތާ ކަމަށް ވެސް ރައީސް ވިދާޅުވެފައި ވެއެވެ.
އެމަނިކުފާނު ވިދާޅުވި ގޮތުގައި، ގަތަރުގެ ސަރުކާރާއި، ރައްޔިތުންނާއެކު ރާއްޖެއިން ދެމިތިބޭނެ އެވެ.
ރައީސް ވިދާޅުވީ ޖެނީވާ ކޮންވެންޝަންއާއި، އދ.ގެ ޗާޓަރާއި، އެތައް ގަރާރުތަކާއި، ބައިނަލްއަގްވާމީ ކޯޓު އޮފް ޖަސްޓިސްގެ ހުކުމްތަކުން ދޭހަވަނީ، އަޅުވެތި ކުރުމާއި، އަދަބު ދިނުމާއި، އާންމުންނަށް ހަމަލާ ދިނުމަކީ ގާނޫނާ ހިލާފު ކަންކަން ކަމަށެވެ.
ރައީސް ވިދާޅުވި ގޮތުގައި، އދ. އާއި އައިސީޖޭ އަދި ބައިނަލްއަގުވާމީ އެކި އިދާރާތަކުން އިޒްރޭލުން ހަނގުރާމައިގެ ޖަރީމާތަކާއި ގަތުލުއާއްމު ހިންގަމުންދާކަން ހެއްކާ އެކު ބުނަމުންދާއިރު، އިޒްރޭލުން ހިންގާ ޖަރީމާތައް ނުފެންނަ ކަމަށް ހަދައިގެން ތިބެވޭކަށް ނެތެވެ.
ބައިނަލްއަގުވާމީ ގާނޫނުތަކުގައި އެއްވެސް މާނައެއް ހުންނާނީ، ހުރިހާ ގައުމުތަކެއްގެ މައްޗަށް ހަމަހަމަކަމާއެކު އެ ގާނޫނުތައް ތަންފީޒުކޮށްގެން ކަން އެ މަނިކުފާނު ފާހަގަ ކުރެއްވި އެވެ.
އެހެންކަމުން، އިޒްރޭލުގެ ޖަރީމާތައް ހަމައެކަނި ކުށްވެރިކޮށްގެން ނުހުއްޓުވޭނެކަމަށް ވިދާޅުވެ، ރައީސް ވަނީ އިޒްރޭލާ ދެކޮޅަށް ހަރުކަށި ފިޔަވަޅު އެޅުމަށް ގޮވާލައްވައިފަ އެވެ.
އަދި ދިވެހި ރާއްޖެއަކީ ކުޑަ ގައުމެއް ނަމަވެސް، އަބަދުވެސް އަނިޔާވެރިކަމާއި ދެކޮޅަށް ތެދުވާނެ ގައުމެއްކަން އެމަނިކުފާނު ފާހަގަކުރެއްވި އެވެ. އަދި މިފަހަރު ސަމިޓަކީ މިއީ ދެކެވޭ ވާހަކަތަކަށްވުރެ ބޮޑަށް އަމަލުތަކުން މިކަން ދައްކުވައިދޭ ސަމިޓަކަށް ހެދުމަށްވެސް ރައީސް ޑރ. މުޢިއްޒު ވަނީ ގޮވާލައްވާފަ އެވެ.
