ޖުމްލަ 260 އަށްވުރެ ގިނަ ވިޔަފާރިތައް ބައިވެރިވާ މި ވޯކްޝޮޕަކީ ދުނިޔޭގެ މަޝްހޫރު އީ-ކޮމާސް ޕްލެޓްފޯމް، އަލީބާބާ އިން އިކޮނޮމިކް މިނިސްޓްރީއާ ގުޅިގެން ބޭއްވި ހަރަކާތެކެވެ. އުރީދޫ މޯލްޑިވްސް އިން ވަނީ މި ވޯކްޝޮޕްގެ ސަޕޯޓިން ޕާޓްނަރެއްގެ ގޮތުގައި މުހިންމު ދައުރެއް އަދާކޮށްފައެވެ.
އެ ކުންފުނިން ދަނީ ދުނިޔޭގެ ފެންވަރުގެ ޑިޖިޓަލް ހިދުމަތްތައް މެދުވެރިކޮށް، ރާއްޖޭގެ ވިޔަފާރިތަކަށް އިންޓަނޭޝަނަލް މާކެޓްގައި ކުރިއެރުމަށް މަގުފަހިކޮށްދިނުމަށް މަސައްކަތް ކުރަމުންނެވެ.
މި ވޯކްޝޮޕްގެ މައިގަނޑު މަގުސަދަކީ، އަލީބާބާ.ކޮމް ފަދަ އޮންލައިން ޕްލެޓްފޯމްތައް މެދުވެރިކޮށް ދިވެހި އުފެއްދުންތައް ބޭރުގެ މާކެޓްތަކަށް ފޯރުކޮށްދިނުމަށް ބޭނުންވާނެ މައުލޫމާތާއި ސްޓްރެޓެޖީތައް ވިޔަފާރިވެރިންނަށް އުނގަންނައިދިނުމެވެ. ބާސެލޯ ނަސަންދުރަ ހޮޓަލުގައި ކުރިއަށް ދިޔަ މި ހަރަކާތް ވަނީ އޮންލައިންކޮށް މުޅި ރާއްޖެއަށް ހުޅުވާލައި، ގިނަ ބަޔަކަށް ބައިވެރިވުމުގެ ފުރުސަތު ފަހިކޮށްދީފައެވެ.
