ރައީސް ޑރ. މުހައްމަދު މުއިއްޒު ވިދާޅުވީ، ރައްޔިތުންގެ މަޖިލީހުގެ އަންނަ ދައުރު ފެށުމާއެކު މި އިސްލާހުތައް އެޖެންޑާކުރައްވާނެ ކަމަށެވެ. މިކަން އެމަނިކުފާނު ހާމަކުރެއްވީ، "ރައްޔިތުންނާ އެކު" ގެ ނަމުގައި ގެނެސްދެއްވާ ޕޮޑްކާސްޓުގެ އެންމެ އާ އެޕިސޯޑުގައި ވާހަކަފުޅު ދައްކަވަމުންނެވެ.
ރައީސް ވިދާޅުވި ގޮތުގައި، ކުރީގެ ރައީސުންނަށް މިހާރު ލިބިވަޑައިގަންނަވާ އިނާޔަތްތަކަކީ ގައުމުގެ އިގްތިސާދީ ހާލަތާ ބަލާއިރު ވަރަށް ބޮޑެތި އަދަދުތަކެކެވެ.
ކުރީގެ ރައީސުންގެ އިތުރުން ރައްޔިތުންގެ މަޖިލީހުގެ މެމްބަރުކަން ކުރައްވާފައިވާ ބޭފުޅުންނަށް ލިބޭ އިނާޔަތްތަކަކީ ވެސް ރައްޔިތުން އިންސާފުވެރި ކަމެއްގެ ގޮތުގައި ނުދެކޭ ކަމަށް ރައީސް ވިދާޅުވި އެވެ. އެއް ދައުރު މަގާމުގައި ހުންނެވުމަށްފަހު ވެސް އިނާޔަތް ލިބޭ ގޮތަށް އޮތުމަކީ ބަދަލުކުރަންޖެހޭ ކަމެއް ކަމަށް އެމަނިކުފާނު ފާހަގަކުރެއްވި އެވެ. މީގެ އިތުރުން ދައުލަތުގެ ވަޒީފާއިން ރިޓަޔާކުރުމަށްފަހު އަލުން ސަރުކާރުގެ ފުލްޓައިމް ވަޒީފާއަކަށް ވަންނަ ފަރާތްތަކަށް، އެ ވަޒީފާގައި އުޅޭ މުއްދަތުގައި ޕެންޝަން ނުލިބޭ ގޮތަށް ހެދުމުގެ އިސްލާހެއް ވެސް ހުށަހަޅުއްވާނެ ކަމަށާއި، މިއީ ރައްޔިތުން ވަރަށް ބޮޑަށް ބޭނުންވާ މުހިންމު ބަދަލުތަކެއް ކަމަށް ރައީސް ވިދާޅުވި އެވެ
