އެ ކުންފުނިން ބުނީ ރަހުނަކާ އެކު 500،000ރ. އަދި ރަހުނަކާ ނުލައި 150،000ރ. ގެ ލޯނު ލިބޭނެ ކަމައެވެ.
ކޮންޓެންޓް ކްރިއޭޓަރުންނަށް ފައިނޭންސް ސްކީމެއްގެ ފުރުސަތު ސަރުން ހުޅުވައިލުމުގެ މައިގަނޑު ބޭނުމަކީ ކޮންޓެންޓް ކްރިއޭޓަރުން ބާރުވެރިކޮށް، ރާއްޖޭގެ ކްރިއޭޓިވް އިގްތިސާދަށް ދެމެހެއްޓެނިވި ކުރިއެރުމެއް ހޯދައިދިނުމެވެ. އެގޮތުން ޑިޖިޓަލް ކޮންޓެންޓް އުފައްދާ ފަރާތްތަކާއި އިންފްލުއެންސަރުންނާއި ވީޑިއޯގްރާފަރުންނަށް އެ މީހުންގެ ވަސީލަތްތައް އިތުރުކޮށް ވިޔަފާރި ފުޅާކުރުމުގެ އިތުރުން އާ ފުރުސަތުތަކެއް މި ލޯނު ސްލީމްގެ ދަށުން ފަހިކޮށްދޭނެ އެވެ.
މި ފެސިލިޓީއަށް އެސްޑީއެފްސީގެ ވެބްސައިޓްގައި ހިމެނޭ އެސްއެމްއީ ޕޯޓަލް މެދުވެރިކޮށް ހުށަހެޅޭނެ ކަމަށް އެސްޑީއެފްސީން ބުންޏެވެ.
އެސްޑީއެފްސީގެ މެނޭޖިން ޑިރެކްޓަރު ބަދުރުއްދީން ހަސަން ވިދާޅުވި ގޮތުގައި، ކްރިއޭޓިވް އިކޮނޮމީއަކީ ދުނިޔޭގައި އެންމެ ހަލުވިކޮށް ކުރިއަރަމުން އަންނަ ދާއިރާތަކުގެ ތެރެއިން އެއް ދާއިރާ އެވެ. ދިވެހި ޒުވާނުންނަކީ މި ހަރަކާތުގެ އެންމެ ކުރީ ސަފުގައި ތިބި ބައެއްކަން އޭނާ ފާހަގަކުރެއްވި އެވެ.
