އެވޯޑަށް ނަން ހުށަހެޅުމުގެ ފުރުސަތު ކުރިން އޮތީ 2 އޮކްޓޯބަރ 2025 ވާ ބުރާސްފަތި ދުވަހުގެރޭ ހަމަވާ ގޮތަށް ބީސީސީން ބުނެ އެވެ.
ނަމަވެސް އެކި ރާއްޖޭގެ އެކި ކަންކޮޅުތަކުގައި ހަރަކާތްތެރިވާ ކުދި ވިޔަފާރިތަކަށް އިތުރު ފުރުސަތެއް ފަހިކޮށްދިނުމުގެ ގޮތުން އެ ސުންގަޑި މިހާރުވަނީ އިތުރު 7 ދުވަހުގެ މުއްދަތަށް އިތުރު ކުރެވިފަކަމަށް އެ އިދާރާއިން ބުނެ އެވެ.
މި އެވޯޑަކީ ވިޔަފާރީގެ ރޮގުން ހާއްސަ ކާމިޔާބީތައް ހޯދާ ފަރާތްތައް ފާހަގަކުރުމަށްޓަކައި، އަހަރަކު އެއް ފަހަރު ބީ.ސީ.ސީ އިން ދިނުމަށް ހަމަޖެހިފައިވާ ހާއްސަ އެވޯޑެކެވެ.
އެގޮތުން ފަނޑިޔާރުން ހޮއްވަވާ 13 ގިންތިއަކާއި، އާންމުންގެ މަގުބޫލުކަމާއެކު ހޮވާ 11 ގިންތިއަކަށް ފޯމު ހުށަހެޅޭނެއެވެ.
މި އެވޯޑާބެހޭ އުސޫލު ބީސީސިން މިހާރު ވަނީ ދިވެހި ސަރުކާރުގެ ގެޒެޓްގައި ޝާއިއު ކޮށްފައެވެ.
އެވޯޑަށް ފޯމު ހުށަހެޅުމުގެ ފުރުސަތު ހުޅުވާލެވިފައިވަނީ ބީސީސީއިން އެކަމަށް ޓަކައި ހާއްސަ ކޮށްފައިވާ އޮންލައިން ޕޯޓަލް މެދުވެރިކޮށް ހުށަހެޅޭނެ ކަމަށް އެ އިދާރާއިން ބުނެ އެވެ.
މި އެވޯޑާއެކު ކުދި ވިޔަފާރިތަކުން ކުރަމުންދާ މަސައްކަތްތައް އަގު ވަޒަންކުރެވި، އައު ބާޒާރުތަކަށް މަގުފަހި ވުމުގައި އިތުރު ބާރަކަށް ވެގެންދާނެ ކަމަށް ބީސީސީން ބުނެ އެވެ.
ދިވެހި މަސައްކަތްތެރިންނާއި ވިޔަފާރިތަކުގެ އުފެއްދުންތެރިކަމާއި، ހުނަރު، އަދި ކުރިއެރުން ފާހަގަ ކުރުމަށް ޓަކައި އިތުރަށް މި ހުޅުވައިލެވުނު ފުރުސަތުގައި ވީހާވެސް ގިނަ ވިޔަފާރިތަކުން ބައިވެރިވުމަށް ބީސީސީން އެދެ އެވެ.
