"ޓޫރިޒަމް އެޓް 50 ޕްލަސް" ޕޮޑްކާސްޓުގައި ވާހަކަ ދައްކަވަމުން އަފީފް ވިދާޅުވީ، މިފަދަ ސްޓްރެޓެޖީއެއް ގެންގުޅުމަކީ، ބޭރުގެ ކުއްލި ލޮޅުންތަކުން ސިނާއަތަށް ކުރާ ނޭދެވޭ އަސަރު ކުޑަކޮށް، ދެމެހެއްޓެނިވި ގޮތެއްގައި ޓޫރިޒަމް ކުރިއެރުވުމަށް އެޅޭނެ މުހިންމު ފިޔަވަޅެއް ކަމަށެވެ.
އަފީފް ފާހަގަކުރެއްވި ގޮތުގައި، ޔޫރަޕް ފަދަ ދުރުގެ މާކެޓްތަކުގައި ދިމާވާ ކަމެއްގެ ސަބަބުން ރާއްޖެ އަންނަ ޓޫރިސްޓުންގެ އަދަދު ދަށްވެއްޖެނަމަ، އެކަމުގެ ސީދާ އަސަރު ރާއްޖޭގެ އިގްތިސާދަށް ވަރަށް ބޮޑަށް ކުރެއެވެ. ނަމަވެސް، ރާއްޖެއާ ކައިރި ސަރަހައްދުތަކުން ޓޫރިސްޓުން ގެނައުމަށް މަސައްކަތް ކުރުމުން، އެފަދަ ހާލަތެއްގައިވެސް ސިނާއަތް ހުއްޓުމަކަށް ނައިސް ހިފެހެއްޓޭނެ ކަމަށް އޭނާ ވިދާޅުވިއެވެ. މިއީ ޓޫރިޒަމް ސިނާއަތް އިތުރަށް ވަރުގަދަ ކުރުމަށްޓަކައި ކޮންމެހެން ވެސް ގެންގުޅެންޖެހޭ ވިސްނުމެއް ކަމަށް އޭނާ ގަބޫލުކުރައްވައެވެ.
