އޭނާ މަރުވީ، މީގެ ދެ ހަފްތާއެއްާ ދުވަސް ކުރިން ހިނގި އެކްސިޑެންޓެއްގައި ލިބުނު ސީރިއަސް އަނިޔާތަކަށް ފަރުވާ ދެމުން ދަނިކޮށް، ބުދަ ދުވަހުއެވެ. އޭނާގެ މަރާ ގުޅިގެން ސަޕޯޓަރުންނާއި، ސިޔާސީ ފަރާތްތަކާއި މިއުޒިކީ ދާއިރާގެ ގިނަ ބަޔަކު ދަނީ ހިތާމަ ފާޅުކުރަމުންނެވެ.
ރިޕޯޓުތައް ބުނާގޮތުން، މި އެކްސިޑެންޓު ހިނގާފައިވަނީ އިންޑިއާގެ އުތުރުގެ ހިމާޗަލް ޕްރަދޭޝްގެ ސޯލަން ޑިސްޓްރިކްޓުގައެވެ. ކުރީގެ ފުލުހެއްވެސް ޖަވަންޑާ ދުއްވަމުން ދިޔަ ސައިކަލު، ގެރިތަކެއްގައި ޖެހި ކޮންޓްރޯލު ނުގެއްލިގެން އޭނާއަށް ވަނީ ވަރަށް ބޮޑެތި އަނިޔާތަކެއް ވެފައެވެ. ޖަވަންޑާ އަކީ ބައިކު ދުއްވުމަށް ވަރަށް ޝައުގުވެރިކަން ހުންނަ ފަރާތެކެވެ. އޭނާ ގިނަ ފަހަރު ދަތުރުތަކުގައި ހޮޓާތަކުގެ ބަދަލުގައި ޓެންޓުގައި ނިދައި، އެޑްވެންޗަރަސް ދިރިއުޅުމެއް އުޅުނު މީހެކެވެ.
ޖަވަންޑާ އަކީ ޒުވާނުންގެ މެދުގައި ވަރަށް މަގުބޫލު ފަންނާނެކެވެ. އޭނާ މަޝްހޫރުވެފައިވަނީ އޭނާގެ ރަނގަޅު އަހުލާގާއި، ލަވަތަކުގައި މަސްތުވާތަކެއްޗާއި ބަޑިފަދަ ތަކެތީގެ ވާހަކަތައް ނުގެންނާތީއެވެ. ލޯތްބާއި ސަގާފީ ވާހަކަތައް ހިމެނޭ އޭނާގެ ލަވަތައް ޔޫޓިއުބުން މިލިއަނުން މީހުން ބަލާފައިވާއިރު، އޭނާގެ ޔޫޓިއުބް ޗެނަލްގައި 900،000 އަށް ވުރެ ގިނަ ފޮލޯވަރުން ތިބެއެވެ.
ލަވަކިޔުންތެރިކަމަކީ ޖަވަންޑާގެ ފުރަތަމަ އަމާޒެއް ނޫނެވެ. އޭނާގެ ބައްޕައަކީ ސްޓޭޓް ޕޮލިހުގެ ވަޒީފާއެއް އަދާކުރި މީހެކެވެ. ނަމަވެސް ކުޑައިރުއްސުރެ އޭނާ މިއުޒިކަށް ހުށަހެޅިފައިވެއެވެ. އޭނާ ބުނީ އޭނާ މިއުޒިކާ ގުޅިފައިވަނީ އޭނާގެ އަވަށުގެ މިއުޒިކީ ފަންނާނުން ހުށަހަޅައިދޭ ޕަންޖާބީ ބެލެޑްތައް އަޑުއަހައިގެން ކަމަށެވެ. ޕަންޖާބް ޔުނިވާސިޓީގައި ތިއޭޓަރުގެ ދާއިރާއިން ކިޔަވަމުން ދަނިކޮށް، އޭނާގެ ލަވަތަކެއް ވައިރަލްވެ، ޕްރޮފެޝަނަލް ގޮތެއްގައި ލަވަކިޔުމުގެ ދާއިރާއަށް ވަނުމަށް މަގުފަހިވިއެވެ.
ޖަވަންޑާގެ މަރާ ގުޅިގެން އޭނާގެ ބައެއް ސަޕޯޓަރުން ވަނީ އިންޑިއާގެ މަގުތަކުގެ ހާލަތާ މެދު ރުޅިވެރިކަން ފާޅުކޮށް، މަގުމަތީގެ ސަލާމަތީ ކަންކަން ރަނގަޅު ކުރުމަށް ސަރުކާރަށް ގޮވާލާފައެވެ.
