ފުލުހުންގެ ހައުސިން މަޝްރޫއު (ބްލޫ ހައުސިން)ގެ އޮޑިޓް ރިޕޯޓުތައް ދިރާސާކުރަން ނެގި ހާއްސަ ސަބް ކޮމިޓީގައި މިދިޔަ އަންގާރަ ދުވަހު ވާހަކަ ދައްކަވަމުން ނާޒިމް ވިދާޅުވީ ކޮމިޝަނަރުކަމުގައި ހަމީދު ހުންނެވިއިރު ފުލުހުންނަށް ބޮޑީ ވޯން ކެމެރާ ގަންނަން ހަވާލުކުރީ ސިންގަލް ސޯސް ޕްރޮކިއުމަންޓް އުސޫލުގެ ދަށުން 66 މިލިއަން ރުފިޔާއަށް ކަމަށެވެ.
އެ މައްސަލައިގައި ޝައްކުތަކެއް އުފެދުނީ ފުރަތަމަ އެ މަސައްކަތް ބީލަމަށް ލުމަށް ފަހު، އެ ބާތިލުކޮށްފައި އަލުން އެ މަސައްކަތް ސިންގަލް ޕްރޮކިއުމަންޓް އުސޫލުން ވަކި ކުންފުންޏަކާއި ހަވާލުކުރުމުން ކަމަށް ނާޒިމް ވިދާޅުވި އެވެ. އެކަމަކު، އެ މުއާމަލާތުގައި އެއްވެސް މައްސަލައެއް ނެތް ކަމަށް ކުރިން ނިންމާފައިވާ ކަމަށް އޭނާ ފާހަގަކުރެއްވި އެވެ.
މަގާމުން ވަކިވުމަށް ފަހު ހަމީދު އެ ކުންފުނީގެ މަގާމެއް އަދާކުރި ކަމަށާއި އެކަމުގައި ނުފޫޒު ފޯރުވާފައިވާކަމަށް ތުހުމަތު ކުރެވޭތީ އޭސީސީން އެކަން އިތުރަށް ބަލާ ކަމަށް ނާޒިމް ވިދާޅުވި އެވެ. އޭސީސީން އެންމެ ފުރަތަމަ އެކަން ބެލި އިރު ޕްރޮޖެކްޓް ހަވާލު ކުރުމުގައި މައްސަލައެއް ފާހަގަނުކުރެވޭ ކަމަށް ނިންމާފައިވާ ކަމަށް ނާޒިމް ވިދާޅުވި އެވެ.
ޕޮލްކޯގެ އަނެއް ބޮޑު ކޮރަޕްޝަންގެ ތުހުމަތު ކުރެވެނީ، އެ ކުންފުނީގެ ދަށުން ހިންގާފައިވާ ކޭޓަރިން ޕްރޮޖެކްޓްތަކުގަ އެވެ. ޕޮލްކޯ އާއި އަމިއްލަ ކުންފުނިތަކާ ދެމެދު ހިންގި ކޭޓަރިން ޕްރޮޖެކްޓްތަކުގައި އެގްރީމެންޓްތައް ހަދާފައިވަނީ އަބަދުވެސް ޕޮލްކޯ އަށް ގެއްލުންވާ ގޮތަށް ކަމަށް ނާޒިމް ވިދާޅުވި އެވެ. އަދި ފަސް އަހަރަށް ހަދަން ކަނޑައެޅި އެގްރީމެންޓެއް 10 އަހަރަށް ހަދާފައިވާކަން ފާހަގަކުރެވޭ ކަމަށް ވެސް އޭނާ ވިދާޅުވި އެވެ.
ހަމީދަށް ކުރާ ތުހުމަތުތައް ދޮގުކުރައްވައި އޭނާގެ ބްލޮގްގައި ލިއުއްވީ ފުލުހުންނަށް އެ ތަކެތި ފޯރުކޮށްދިން ޒެޓާ އެންޓަޕްރައިސަސްގެ ތަކެއްޗަކީ ދުނިޔޭގެ ކުރިއަރާފައިވާ ގިނަ ގައުމުތަކުން ވެސް ބޭނުންކުރާ ތަކެތި ކަމަށެވެ.
އެ ގޮތުން އެމެރިކާ، އިނގިރޭސިވިލާތް، އޮސްޓްރޭލިއާ އަދި ސިންގަޕޫރު ފާހަގަކުރެއްވި އެވެ. އެ ކުންފުނިން ފޯރުކޮށްދީފައިވަނީ އެކްސަންގެ އުފެއްދުންތަކެވެ.
އަދި އެ ކުންފުނީގެ ދަށުން ހިންގާ ޒެޓާ ޓެކްނޮލޮޖީސްއަކީ ރާއްޖޭގައި އެކްސަންގެ އުފެއްދުންތައް އެތެރެކޮށް ވިއްކުމުގެ ހުއްދަ އޮންނަ ހަމައެކަނި ޑިސްޓްރިބިއުޓަރެވެ.
ދެހާސް ނަވާރަ ވަނަ އަހަރު ކޮމިޝަނާ އޮފް ޕޮލިސްގެ މަގާމަށް އައްޔަންކުރި ފަހުން، 15 ނޮވެންބަރު 2023ގައި ރިޓަޔާ ކުރެއްވި ހަމީދު ވިދާޅުވީ، ޒެޓާ ޓެކްނޮލޮޖީސްއިން އޭނާއަށް މަގާމެއް ހުށަހެޅީ މި އަހަރުގެ ކުރީކޮޅު ކަމަށެވެ.
އޭނާ ވިދާޅުވީ އެ ކުންފުނިން އޭނާއަށް ވަޒީފާއެއް ހުށަހެޅީ ނުރޫޒެއްގެ ސަބަބުން ނޫން ކަމަށާއި ނަމަވެސް އޭނާގެ ތަޖުރިބާއަށް ބަލައިފައި ކަމަށެވެ. އެގޮތުން އޭނާގެ ދައުރުގައި ފުލުހުންގެ މުއައްސަސާގެ ޑިޖިޓަލައިޒޭޝަނަށް ގިނަ މަސައްކަތްތަކެއް ކުރެއްވިކަން ފާހަގަކުރެއްވި އެވެ.
އެހެންވެ، ޒެޓާ ޓެކްނޮލޮޖީސްއިން ވިޔަފާރި ފުޅާކުރުމަށް ބޭނުންވާ ތަޖުރިބާ ހުރުމުން، ޖެނެރަލް މެނޭޖަރެއްގެ މަގާމު ހުށަހެޅީ ކަމަށް ވިދާޅުވި އެވެ.
އެއަށްފަހު ހަމީދު ފާހަގަކުރެއްވީ، ތަންފީޒީ އިދާރާއެއްގައި އިސްކޮށް މަސައްކަތްކުރެއްވި ބޭފުޅަކު، ސަރުކާރަށް ޓެކްނޮލޮޖީ ފޯރުކޮށްދޭ ކުންފުންޏަކާ ގުޅުން މަނާކުރާ ގާނޫނެއް ނުވަތަ ގަވައިދެއް ވެސް ނޯންނަ ކަމެވެ. އަދި ތަރައްގީވެފައިވާ ގިނަ ގައުމުތަކެއްގައި ވެސް، އެފަދަ ބޭފުޅުން ވަކި މުއްދަތަކަށް ފަހު އަމިއްލަ ކުންފުނިތަކާ ގުޅޭ ކަމަށް ހަމީދު ވިދާޅުވި އެވެ.
އާންމުކޮށް އެ މުއްދަތަކީ ހަ މަހާއި ދެ އަހަރާ ދެމެދުގެ މުއްދަތެއްކަން ފާހަގަކުރައްވައި އޭނާ ވިދާޅުވީ، އޭނާ ރިޓަޔާ ކުރެއްވުމަށް ފަހު އާ ވަޒީފާ ފެއްޓެވީ ދޮޅު އަހަރު ފަހުން ކަމަށެވެ.
ހަމީދު ވިދާޅުވީ އެ ތުހުމަތުތައް ކުރަނީ، ފުލުހުންގެ ހިދުމަތަށްވުރެ ސިޔާސީ އަދި އަމިއްލަ ބޭނުންތައް އިސްކުރާ ބަޔެއް ކަމަށާއި އެއީ ކޮން ބަޔަކުކަން ވެސް އެނގޭ ކަމަށެވެ. ނަމަވެސް އެކަމާ ގުޅޭ ތަފުސީލެއް އޭނާ ނުދެއްވައެވެ.
