ލ. މާވަށު ރައްޔިތުންނާ ބައްދަލުކުރައްވާ ރައީސް މުއިއްޒު ވިދާޅުވީ ވެވަޑައިގެންނެވި ކޮންމެ ވައުދެއް ފުއްދަވާނެ ކަމަށާއި ވައުދު ވަނީ ވައުދު ފުއްދޭނެ ކަމުގެ ޔަގީންކަން އޮވެގެން ކަމަށެވެ.
ލ. އަތޮޅުގެ ދެވަނަ އެއާޕޯޓް ތަރައްގީކުރާނީ އެކަމަށް އެންމެ އެކަށީގެންވާ ސަރަހައްދުގައި ކަމަށް ރައީސް ވިދާޅުވި އެވެ. ލ. އަތޮޅުގައި މިވަގުތު އެއާޕޯޓެއް އޮންނަނީ ކައްދޫގައި އެކަންޏެވެ.
ރައީސް ވިދާޅުވީ، އެމަނިކުފާނުގެ މި ދަތުރުފުޅުގެ ތެރެއިން މިއަދު އަމަލީ މަސައްކަތް ފެށިގެން މިދިޔަ ކޮންމެ މަޝްރޫއަކީ ވައުދުވީގޮތަށް ކުރިއަށްގެންގޮސް ނިންމަވާނެ މަޝްރޫއުތަކެއްކަމަށެވެ.
ސިއްހީ ދާއިރާ ކުރިއެރުވުމަށްޓަކައި ހިތަދޫގައި ފެށިގެން މިިދިޔަ މަސައްކަތަކީ ކުރިއަށް އޮތްތަނުގައި ހޮސްޕިޓަލަކަށް ބަދަލުކުރުމަށް ސަރުކާރުން ކުރައްވާ މަސައްކަތަށް ލިބިގެންދިޔަ ބާރެއްކަމަށް ރައީސް ވިދާޅުވި އެވެ. 4 އެނދުގެ ވޯޑާއެކު އިތުރު ހިދުމަތް ގާއިމުވެގެންދިޔުމުން ހޮސްޕިޓަލަކަށް ބަދަލުކުރުމަށް މަގުފަހިވެގެންދާނެ ފާހަގަކުރެއްވި އެވެ. އަދި އަންނަ އަހަރުގެ ބަޖެޓު ތައްޔާރުކުރުމުގައި ރާއްޖޭގެ ހުރިހާ ރަށެއްގެ ސިއްހީ ހިދުމަތް ފުޅާކުރުމަށް ކުރެވޭ މަސައްކަތުގެ ދަށުން އިތުރު މުވައްޒަފުން ހިތަދުއަށްވެސް ނަގާނެކަމަށް ރައީސް ވިދާޅުވި އެވެ.
ހިތަދޫގެ ސްކޫލްގެ މަސައްކަތް ފެށުމަށްވެސް މަސައްކަތް ކުރަމުންދާއިރު ހަފްތާއެއްގެ ތެރޭގައި ހަވާލުކޮށް މިއަހަރުގެ ތެރޭގައި މަސައްކަތް އަމަލީގޮތުން ފެށިގެންދާނެކަމަށް ރައީސް ވިދާޅުވި އެވެ. މީގެއިތުރުން ބީއެމްއެލްގެ ބްރާންޗްގެ މަސައްކަތާއި ހިތަދޫއާއި ކުނަހަންދޫގެ ކޯޒްވޭގެ މަސައްކަތްވެސް ބާރު ދުވެއްޔެއްގައި ކުރިއަށްދާނެކަމުގެ ޔަގީންކަން ހިތަދޫގެ ރައްޔިތުންނަށް ރައީސް ވަނީ ދެއްވާފަ އެވެ.
ލ. އަތޮޅަށް އިތުރު އެއާޕޯޓެއް ބޭނުންވާ ކަމަށް ރައީސް ޑރ. މުއިއްޒު ވިދާޅުވިއިރު، ސްޕީޑް ބޯޓެއްގައި ދެވޭހާ ކައިރިކައިރީގައި އެއާޕޯޓްތައް އެޅުމުން ލޯކަލް ޓޫރިޒަމަށް ވެސް ކުރަން ޖެހޭ މަންފާތައް ނުކުރާނެ ކަމަށް ކުރީގެ ރައީސް މުހައްމަދު ނަޝީދު މިފަހުން ވަނީ ވިދާޅުވެފަ އެވެ.
