އެމްޕީއެލް ބަނދަރު ސަރަހައްދުގައި ހިނގި މި ހާދިސާގައި ދެ މީހަކު ވަނީ ނިޔާވެފައެވެ. އޭއީ ދިވެއްސަކާއި ބަންގްލަދޭޝްގެ ރައްޔިތެކެވެ.
އެ މައްސަލާގައި އެމްޕީއެލްގެ އެތެރޭގެ ތަހުގީގެއް ހިންގާ ފާހަގަވި ކަންކަން ވަނީ އާއްމުކޮށްފައެވެ. އެ ރިޕޯޓްގައިވާ ގޮތުން ކޮޅުވެއްޓި ބަންޑުން ޖަހާލީ އޭގެ ކެޕްޓަނަކާސް ހުރި މީހާ އެދިގެން އެކްސްކަވޭޓަރެއް އެއްފަރާތަކަށް ޖެއްސުމުން ކަމަށް އެމްޕީއެލް ރިޕޯޓްގައިވެއެވެ. އަދި އޭނާ އެކްސްކަވޭޓަރު ހުރިތަން ބަދަލުކުރުވީ އެމްޕީއެލްގެ މުވައްޒަފުން އެ މަސަައްކަތް ނިންމައިލި ފަހުން ކަމަށް ތަހުގީގަށް އެނގިފައިވާކަމަށްވެސް އެމްޕީއެލްއިން ބުނެއެވެ.
އެ ރިޕޯޓްގޢިވާ ގޮތުން ލޭންޑިން ކްރާފްޓްގެ ކެޕްޓަންގެ އަތުގައި މިފަދަ އުޅަނދެއް ދުއްވުމުގެ ލައިސަންސް އަދި ނިޔަމިކަމުގެ ސެޓްފިކެޓް ނެތެވެ.
އެމްޕީއެލް އިން ބުނީ ލޭންޑިން ކްރާފްޓަށް ދެ އެކްސްކެވޭޓަރު ބޭލުމުގެ އޮޕަރޭޝަންސްތައް އެ ކުންފުނިން ފުރިހަމަކޮށް، ނިންމާފައިވަނީ މިފަދަ އޮޕަރޭޝަންސްތަކުގައި މި ވަގުތު އަމަލުކުރަމުން އަންނަ އުސޫލުތަކާއި އެއްގޮތްވާ ގޮތުގެ މަތިންކަމަށެވެ.
ލޭންޑިން ކްރާފްޓް ބަންޑުން ޖަހާލި ވަގުތު އެ އުޅަނދުގައި ތިބި އެމްޕީއެލްގެ 10 މުވައްޒަފުން ވަނީ މޫދަށް ވެއްޓި، އެކި ވަރުގެ އަނިޔާތައް ވެފައިކަމަށް ރިޕޯޓްގައިވެއެވެ އަދި އެމްޕީއެލްގެ މުވައްޒަފުން އެ އުޅަނދުގައި އެ ވަގުތު ތިބީ މަސައްކަތް ނިންމާލުމަށް ފަހު، މުވައްޒަފުން އަނބުރާ މާލޭ ވިޔަފާރި ބަނދަރަށް އައުމަށް އަރަންޖެހޭ ޓަގު ބޯޓަށް އެރެން އޮތީ ލޭންޑިން ކްރާފްޓް ގިރާކޮށްފައި ކަމުގައިވުންމުންކަންވެސް އެ ރިޕޯޓްގައި ވަނީ ފާހަގަކޮށްފައެވެ.
އެމްޕީއެލް ބަނދަރު ސަރަހައްދުން ބަންޑުން ޖަހާލީ " އައި އެންޑް ސީ ހަލީމާ" ނަމަކަށް ކިޔާ ކޮޅުވެއްޓިއެކެވެ. އެ ބަންޑުން ޖަހާލީ ހައިމާކުތަކެއް އެއަށް ބަރުކުރުމުގެ މަސައްކަތް ކުރަމުން އަންނަނިކޮށެވެ.
