އެމްޑީއާރު ނުވަތަ މާޗަންޓް ޑިސްކައުންޓް ރޭޓަކީ، ބީއެމްއެލްގެ ކާޑު މެޝިންތަކުގައި ކާޑު މެދުވެރިކޮށް ވިޔަފާރި ކުރުމުން ވިޔަފާރިވެރިންގެ އަތުން ނަގާ ކޮމިޝަނެވެ. މި ކޮމިޝަން ބޮޑުކަމުން ގިނަ ވިޔަފާރިވެރިން ކާޑު މެސިން ފިހާރަތަކުގައި ބަހައްޓަން ބޭނުން ނުވެއެވެ.
ބީއެމްއެލުން ބުނީ މާޗަންޓް ޑިސްކައުންޓް ރޭޓް (އެމްޑީއާރް) މިއަދުން ފެށިގެން 1 ޕަސެންޓަށް މިއަދުން ފެށިގެން ކުޑަކޮށްފައިވާކަމަށެވެ. 2000 ވަނަ އަހަރު ޑެބިޓް ކާޑު ތައާރަފްކުރީންސުރެ މާޗަންޓް ޑިސްކައުންޓް ރޭޓް މި ފީ ހުރީ 2.5 ޕަސެންޓުގައެވެ. ބޭންކުން ބުނީ މިއަދަދު ކުޑަކުރީ ބޭންކުގެ 43 ވަނަ އަހަރީ ދުވަހާ ގުޅުވައިގެން ކަމަށެވެ.
މި ފީ ކުޑަކުރުމުން ބީއެމްއެލްގެ ޕޭމަންޓް ހިދުމަތްތައް ބޭނުންކުރާ 7،000 އަށް ވުރެ ގިނަ ވިޔަފާރިވެރިންނަށް މިކަމުގެ ސީދާ ފައިދާކުރާނެ ކަމަށް ބީއެމްއެލް އިން ބުނެއެވެ.
އެމްޑީއާރު ފީ ކުޑަކުރުމުގެ އިތުރުން، ބީއެމްއެލް އިން އާ އެޑްވާންސް މާޗަންޓް ސެޓްލްމަންޓް ފެސިލިޓީއެއް ވެސް މިއަދު ތައާރަފްކޮށްފަ އެވެ.
ބޭންކުގެ ވިޔަފާރި ކަސްޓަމަރުންނަށް މާލީ ގޮތުން އިތުރު ލުއިފަސޭހަތަކެއް ފޯރުކޮށްދިނުމަށް ތައާރަފުކުރި މި ފެސިލިޓީން ރަހުނަކާ ނުލައި ، ވިޔަފާރިތަކަށް އެ ވިޔަފާރިއަކުން ފާއިތުވި ހަ މަސް ދުވަހު ބީއެމްއެލް ކާޑު މެޝިނުން ވިޔަފާރިކޮށްފައިވާ މިންވަރަށް ބަލައި، ދެ މިލިއަން ރުފިޔާއާ ހަމައަށް އަވަސް ގޮތެއްގައި ފައިސާ ހަމަޖެހޭނެ އެވެ.
މި ފައިސާ އަނބުރާ ދައްކަން ޖެހޭ މުއްދަތު ކަނޑައަޅާނީ އެ ވިޔަފާރިއަކަށް ކޮންމެ ދުވަހެއްގެ މައްޗަށް ލިބޭ އާމްދަނީއަށް ބަލައި ފަސޭހަ އުސޫލަކުން ކަނޑާލެވޭ ގޮތަށް ކަމަށް ބީއެމްއެލް އިން ބުނެއެވެ.
