މިނިސްޓަރު މިހެން ވިދާޅުވީ އަންނަ އަހަރަށް ހުށަހަޅާފައިވާ ބަޖެޓު ދިރާސާކުރާ ރައްޔިތުންގެ މަޖިލީހުގެ ކޮމިޓީގައި އިދިކޮޅު މެންބަރަކު ކުރެއްވި ސުވާލަކަށް ޖަވާބު ދެއްވަމުންނެވެ.
މި ބަހުސް ފެށުނީ އެމްޑީޕީގެ ޕާލިމެންޓްރީ ގްރޫޕުގެ ލީޑަރު އަދި ހިތަދޫ ދެކުނު ދާއިރާގެ މެންބަރު އިބްރާހިމް ނާޒިލް ކުރެއްވި ސުވާލަކާ ގުޅިގެންނެވެ. ނާޒިލް ވިދާޅުވީ، ކޮންމެ ސަރުކާރަކުންވެސް ކުރީ ސަރުކާރުގެ ދަރަނި ދައްކަމުން އަންނަ ކަމަށާއި، ނިމިދިޔަ އެމްޑީޕީ ސަރުކާރުންވެސް ބްރިޖާއި ދަރުމަވަންތަ ހޮސްޕިޓަލް ފަދަ ބޮޑެތި މަޝްރޫއުތަކަށް ނެގި ލޯނުތައް ދެއްކި ކަމަށެވެ. އެއަށްފަހު، 2028 ވަނަ އަހަރު މި ސަރުކާރު ނިމޭއިރު، ދެން އަންނަ ސަރުކާރަކުން ދައްކަންޖެހޭ ދަރަންޏެއް އޮންނާނެތޯ އޭނާ ސުވާލު ކުރެއްވި އެވެ.
މިނިސްޓަރު ޒަމީރުގެ ޖަވާބާ ގުޅިގެން، ބަޖެޓް ފޮތުގައި މަޝްރޫއުތަކުގެ ތަފްސީލު ނެތުމުގެ ކަންބޮޑުވުންވެސް ނާޒިލް ފާޅުކުރެއްވި އެވެ. އޭނާ ވިދާޅުވީ އެއީ ހަމައެކަނި އިދިކޮޅުގެ ކަންބޮޑުވުމެއް ނޫން ކަމަށާއި، އޮޑިޓާ ޖެނެރަލްވެސް އެކަން ފާހަގަކުރައްވާފައިވާ ކަމަށެވެ. ޖަވާބުގައި މިނިސްޓަރު ވިދާޅުވީ، ބަޖެޓުގައި ތަފްސީލުތައް ނުހިމަނަނީ ރައްޔިތުން ބޭނުންވާ ގޮތަށް މަޝްރޫއުތައް ހިންގުމަށް ލުއި ގޮތްތަކެއް ހޯދައިދިނުމުގެ ބޭނުމުގައި ކަމަށެވެ. އަދި ރަށެއްގެ ހާލަތު އެންމެ ރަނގަޅަށް އެނގޭނީ އެ ރަށަކަށް ގޮސްގެން ކަމަށްވެސް އޭނާ ވިދާޅުވި އެވެ.
