ފޮރިން މިނިސްޓްރީން ނެރުން ބަޔާނެއްގައި ބުނެފައިވަނީ މިއީ “ޑިޓްވާ” ތޫފާންގެ ސަބަބުން ސްރީލަންކާ ގެ އެކި ހިސާބުތަކަށް ބޯކޮށް ވާރޭވެހި އެ ގައުމުގެ ރައްޔިތުންނަށް ލިބިފައިވާ ގެއްލުންތަކާއި ދަތިތަކުން އަރައިގަތުމަށް އެ ގައުމަށް އެހީތެރިވުމުގެ ގޮތުން ދޭ ނިންމި އެހީތެރިކަމެއް ކަމަށެެވެ.
ސްރީލަންކާގައި ފެންބޮޑުވެފައި
މި އެހީތެރިކަން ރަމްޒުކޮށްދެނީ ދެ ގައުމުގެ ދެމެދުގައި އޮތް ގާތް އެކުވެރި ގުޅުމާއި މިފަދަ އުނދަގޫ ދަނޑިވަޅެއްގައި އެ ގައުމުގެ ރައްޔިތުންނާއެކު ދިވެހި ރައްޔިތުން ތިބިކަމެވެ.
އަދި ރާއްޖެއިން އުއްމީދުކުރަނީ މި އެހީގެ ސަބަބުން ހާލުގައި ޖެހިފައިވާ ސްރީލަންކާ ރައްޔިތުންނަށް ކޮންމެވެސް ވަރެއްގެ ތަސައްލީއެއް ލިބި، ސްރީލަންކާ ސަރުކާރުން ކުރަމުންދާ މަސައްކަތައް ކޮންމެވެސް ވަރެއްގެ ލުއިކަމެއް ލިބޭނެކަމަށެވެ.
އަދި މިފަދަ ކަންކަމުން ދައްކުވައިދެނީ ދެ ޤައުމުގެ ދެމެދުގައި އާއި ރައްޔިތުންގެ މެދުގައި ހިއްސާކުރާ ގާތް އެކުވެރި ގުޅުމެވެ.
ސްރީ ލަންކާއަށް ކުރަމުންދާ ވިއްސާރާގައި ފެން ބޮޑުވުމާއި ބިންގަނޑު ކަނޑައިގެން ދިއުމުގެ ހާދިސާތަކުގައި މި ހަފްތާ ތެރޭ 68 މީހުން މަރުވެފައިވާ ކަމަށް އެ ގައުމުގެ ކަމާ ބެހޭ އިދާރާތަކުން މައުލޫމާތު ދެ އެވެ.
މޫސުން ގޯސްވުމުގެ ސަބަބުން ރިޕޯޓުކޮށްފައިވާ އެކި ހާދިސާތަކުގައި 14 މީހުން ވީނުވީއެއް ނޭގި ގެއްލިފައިވާ ކަމަށްވެސް ލަންކާ ނޫސްތަކުން ރިޕޯޓުކޮށްފައި ވެއެވެ.
ކުރިއަށް އޮތް ދުވަސްތަކުގައިވެސް ބޯކޮށް ވާރޭވެހި ވައިގަދަވާނެ ލަފާކޮށް ރެޑް އެލާޓްވެސް އެ ގައުމުގެ މުސުމާބެހޭ ގައުމީ އިދާރާއިން ވަނީ ނެރެފަ އެވެ.
ލަންކާއަށް މިހާރު ކުރަމުންދަނީ މޫސުމީ ވިއްސާރައެއް ނަމަވެސް އެ ގައުމުގެ އިރުމަތީ އުފެދިފައިވާ ޑިޕްރެޝަނެއްގެ ސަބަބުން މޫސުން އިތުރަށް ވަނީ ގޯސްވެފަ އެވެ.
މޫސުން ގޯސްވުމުގެ ސަބަބުން ލަންކާގައި ވަނީ ސްކޫލްތަކުގެ ފަހު އިމްތިހާނު ދެ ދުވަހަށް ފަސްކޮށްފި އެވެ.
