މިއަދު އޮތް މާލެ ސިޓީ ކައުންސިލްގެ ޖަލްސާގައި ވާހަކަދައްކަވަމުން މާލޭގެ މޭޔަރު، އާދަމް އާޒިމް ވިދާޅުވީ މާލޭގެ ބިންތަކަކާ ބެހޭ ކޮންޓްރެކްޓެއް ނަހުލާ ނައްތާލަން އުޅުނުކަމަށެވެ. އެގޮތުން ނަހުލާ އެ ކޮންޓްރެކްޓްތައް ވިދާލާ މަންޒަރު ފެންނަ ވީޑިއޯވެސް ހުރިކަން މޭޔަރު އާޒިމް ފާހަގަކުރެއްވިއެވެ.
އާޒިމް ވަނީ ނަހުލާ ކޮންޓްރެކްޓްތައް ވިދާލާ މަންޒަރު ފެންނަ ވީޑިއޯ ހުރިހާ ކައުންސިލަރުންނާވެސް މިއަދު ހިއްސާކޮށްފައެވެ. ނަހުލާ ވީދާލާ ނަތްތާލަން މަސައްކަތްކޮށްފައިވަނީ އެ ކައުންސިލުން މި ފަހުން އާއްމުކުރި ބިމުގެ ދަފުތަރުގައި ނުހިމެނި އޮތް ކޮންޓްރެކްޓެއް ކަމަށްވެސް އާދަމް އާޒިމް ވިދާޅުވިއެވެ.
ރަސްމީ ލިޔެކިޔުމެއް ވީދާލުމަކީ ޖިނާއީ ކުށެއް ކަމަށާއި ސިޓީ ކައުންސިލުގައި ހުންނަ އެއްވެސް ލިޔެކިޔުމެއް ނައްތާލުމުގެ ބާރު އެ ކައުންސިލުގެ އެއްވެސް މެމްބަރަކަށް ލިބިގެން ނުވާ ކަމަށެވެ. އެހެންކަމުން އެ މައްސަލަ ފުލުހުންނާއި އެލްޖީއޭއަށް ހުށައަޅާފައިވާކަމަށް އާދަމް އާޒިމް ވިދާޅުވިއެވެ.
ކައުންސިލްގެ ކަންކަން ހުރީ ވަރަށް ގޯސްކޮށްކަމަށާއި އެކަން ކަން ހާމަކޮށްދިނުމަށް މަސައްކަތް ކުރަމުން އަންނަކަމަށް މޭޔަރު އާދަމް އާޒިމް ވިދާޅުވިއެވެ.
މޭޔަރު އާޒިމްގެ ވާހަކަކަށް ނަހުލާ ވަނީ މިއަދު ކައުންސިލް ބައްދަލުވުމުގައި ޖަވާބުދާރީވެޑައިގެންފައެވެ. އެގޮތުން މޭޔަރު ވިދާޅުވި އެގްރިމެންޓް ވީދާލިކަމަށް ނަހުލާ އިއުތިރާފުވެވަޑައިގެންފައެވެ. ނަހުލާ ވިދާޅުވީ އޭނާ ވީދާލީ ކުރީގެ ތާރީހެއް ޖަހައިގެން ވިލިމާލޭގެ ބިމެއް ހަވާލުކުރުމަށް މިދިޔަ ބުރާސްފަތި ދުވަހު ސޮއިކުރި ލިޔުމެއް ކަމަށެވެ.
ނަހުލާ ވިދާޅުވީ އޮޅުވާލައިގެން ސޮޮއިކުރި ލިޔެކިޔުމަކީ ކައުންސިލްގައި އޮންނަންޖެހޭ އެއްޗަކަށް ނުވާތީ އެ ލިޔުން ވީދާލިކަމަށް ނަހުލާ ވިދާޅުވިއެވެ.
މާލެއިން ކުއްޔަށް ދޫކޮށްފައިވާ ބިންތަކުގެ ލިސްޓް ކައުންސިލުން ދާދި ފަހުން ވަނީ އާއްމުކޮށްފައެވެ.
