އެމަނިކުފާނު މިހެން ވިދާޅުވީ، މާފަންނު ރައްޔިތުންނާ ބައްދަލުކުރެއްވުމަށް ބޭއްވި ބައްދަލުވުމުގައި ވާހަކަފުޅު ދައްކަވަމުންނެވެ.
މި ބައްދަލުވުން ފެއްޓެވުމުގެ ގޮތުން ވާހަކަފުޅު ދައްކަވަމުން ރައީސް ޑރ. މުހައްމަދު މުއިއްޒު ވިދާޅުވީ، ކޮންމެ ރައްޔިތަކަށްވެސް ދިމާވާ މައްސަލަތައް ހައްލުކުރުމަަށް ސަރުކާރުން ވަރަށް ބޮޑު އިސްކަމެއް ދީގެން މަސައްކަތް ކުރައްވާކަމަށެވެ.
ރައީސް ވިދާޅުވީ ރައްޔިތުންނާއެކު ބާއްވާ ބައްދަލުވުންތަކުގައި ހުށަހަޅާ ކަންތައްތަކަށް ވަރަށް އީޖާބީ ގޮތެއްގައި ހައްލު ހޯދައިދިނުމުގެ މަސައްކަތް ކުރައްވާނެ ކަމަށެވެ. އެގޮތުން ރައްޔިތުންގެ ކަންބޮޑުވުންތަކާއި، ހިޔާލުތަކާއި، މަޝްވަރާތައް ހިއްސާކުރުމަށް އެމަނިކުފާނު ވަނީ އެދިވަޑައިގެންފަ އެވެ.
މިރޭގެ ބައްދަލުވުން ނިމިގެން ރައްޔިތުންނަށް އަމިއްލަ ކަމެއްގައި ވިޔަސް އެ މަނިކުފާނާ ސިޓީއެއް ހަވާލުކޮށްލުމުގެ ފުރުސަތު އޮންނާނެކަން އެ މަނިކުފާނު ފާހަގަކުރައްވި އެވެ. އަދި ރައްޔިތުންގެ ކޮންމެ ހުށަހެޅުމެއް ދޫކޮށްނުލައި އެ ކަމަކަށް "އިރާދަކުރެއްވިއްޔާ އެޓެންޑްވާނެ" ކަމަށް ރައީސް ވިދާޅުވި އެވެ.
މާލޭގެ އަވަށްތަކުގެ ރައްޔިތުންނާ ބައްދަލުކުރައްވާނެ ކަން މި ސަރުކާރަށް ދެ އަހަރު ފުރުނު ދުވަހުގެ ރޭ (މިދިޔަ ނޮވެމްބަރު 17) އިއުލާން ކުރެއްވި ފަހުން ރައީސް މުއިއްޒު މިހާތަނަށް ވަނީ ތިން އަވަށުގެ މީހުންނާ ބައްދަލުކުރައްވައިފަ އެވެ. އެއީ ވިލިމާލެ އާއި މައްޗަންގޮޅި އަދި މާފަންނެވެ. އެ ދެ ބައްދަލުވުމުގައި ވެސް ރައްޔިތުން ހަވާލުކުރި ސިޓީތަކާއި ވިދާޅުވެފައިވާ ކަންކަމަށް ވީހާ ވެސް ރަނގަޅަކަށް ކަންކަން ކޮށްދެވޭތޯ ބައްލަވަމުން ގެންދަވާ ކަމަށް ރައީސް ވިދާޅުވި އެވެ.
