ފިޝަރީޒް މިނިސްޓްރީއާއި އެސްއެމްއީ ޑިޖިޓަލް ގުޅިގެން ކުރިއަށްގެންދާ މި ސްކީމަށް ކުރިމަތިލުމުގެ ފުރުސަތު މި މަހުގެ 13 ވަނަ ދުވަހުން ފެށިގެން ހުޅުވާލުމަށް ވަނީ ހަމަޖެހިފައެވެ. މިއީ މަހުގެ ބާވަތްތަކުން ތައްޔާރުކުރާ އުފެއްދުންތައް އިތުރުކޮށް، އެ ތަކެތި ބާޒާރަށް ނެރުމަށް ވިޔަފާރިތަކަށް އެހީތެރިވުމުގެ ގޮތުން އިސްލާމީ އުސޫލުތަކާ އެއްގޮތްވާ ގޮތުގެ މަތިން އެކުލަވާލާފައިވާ ސްކީމެކެވެ.
މި ސްކީމުގެ ދަށުން ރަހުނަކާ ނުލައި، 50,000 ރުފިޔާއިން ފެށިގެން 400,000 ރުފިޔާއާ ދެމެދުގެ އަދަދަކަށް ފައިސާ ލިބޭނެ ކަމަށް އެސްއެމްއީ ޑިޖިޓަލް އިން ބުނެއެވެ. މި ފައިނޭންސިން ދޫކުރަނީ މަސްވެރިންނަށް މި ވަގުތު ދެވެން އޮތް އެންމެ ކުޑަ ރޭޓު ކަމަށްވާ 6 ޕަސަންޓު ރޭޓުގައެވެ. އަދި ފައިސާ އަނބުރާ ދެއްކުމަށްޓަކައި 6 މަސް ދުވަހުގެ ގްރޭސް ޕީރިއަޑަކާ އެކު، ގިނަވެގެން 7 އަހަރުގެ މުއްދަތެއް ލިބޭނެއެވެ. މި ފައިސާ ބޭނުންކުރެވޭނީ މަސް ޕްރޮސެސްކުރުމަށް ބޭނުންވާ ސާމާނާއި، ޕެކޭޖިންއަށް ބޭނުންވާ ވަސީލަތްތަކުގެ އިތުރުން މަސް ރައްކާކުރާނެ ނިޒާމްތައް ގާއިމްކުރުން ފަދަ ކަންކަމަށެވެ.
މިކަމާ ގުޅޭގޮތުން އެސްއެމްއީ ޑިޖިޓަލް އިން ހާމަކުރި ގޮތުގައި، މި ސްކީމްގެ ސަބަބުން ދިވެހި މަސްވެރިކަމުގެ އުފެއްދުންތަކުގެ ފެންވަރު މަތިވެ، ބައިނަލްއަގުވާމީ މާކެޓަށް އެކްސްޕޯޓްކުރުމުގެ ފުރުސަތު ފުޅާވެގެންދާނެއެވެ. އެ ކުންފުނީގެ ސީއީއޯ ބަދުރުއްދީން ހަސަން ވިދާޅުވީ، މިއީ މަސްވެރިންނަށް ލިބޭ ނަފާ އިތުރުކުރުމަށް އެޅޭ މުހިންމު ފިޔަވަޅެއް ކަމަށެވެ. މިދިޔަ ދެ އަހަރުގެ ތެރޭގައި ވެސް ފިޝަރީޒް މިނިސްޓްރީއާއި އެ ކުންފުނި ގުޅިގެން ވަނީ ފަރުމަސްވެރިކަމާއި އޮޑިދޯނިފަހަރުގެ ވަސީލަތްތައް ތަރައްގީކުރުމަށް ގިނަ ލޯނުތަކެއް ދޫކޮށްފައެވެ.
