އަބީޝެކް ހާމަކުރި ގޮތުގައި މި މައްސަލަ ކޯޓަށް ހުށަހަޅަން ޖެހުނު އެންމެ ބޮޑު ސަބަބަކީ އެ ދެމަފިރިންގެ ދަރިފުޅު، އާރާދިޔާ ބައްޗަންގެ ޕްރައިވެސީ ހިމާޔަތްކުރުމެވެ. މިއީ އެ އާއިލާގެ "ޕާސަނަލިޓީ ރައިޓްސް" ނުވަތަ ޝަހުސީ ހައްގުތައް ރައްކާތެރިކުރުމަށް އެޅި މުހިންމު ފިޔަވަޅެކެވެ.
މި މައްސަލަ ފެންމަތިވީ ޔޫޓިއުބް ޗެނަލްތަކަކުން އާރާދިޔާ އާ ގުޅޭގޮތުން ހަގީގަތާ ހިލާފު ދޮގު މައުލޫމާތުތަކެއް ފެތުރުމާ ގުޅިގެންނެވެ. ބައެއް ޗެނަލްތަކުން ވަނީ އާރާދިޔާ ބޮޑު ބައްޔެއް ވެފައިވާ ކަމަށް ބުނެ، އޭނާގެ ފުރާނައަށް ނުރައްކާވެފައިވާ ކަމަށް ދޭހަވާ ގޮތަށް ވީޑިއޯތައް އާންމުކޮށްފައެވެ. މިކަމާ ގުޅިގެން ދިއްލީ ހައި ކޯޓުން ވަނީ އެފަދަ ވީޑިއޯތައް ފެތުރުން މަނާކޮށް، އެ ވާހަކަތައް ދެއްކި ފަރާތްތަކާ ދެކޮޅަށް އަމުރެއް ނެރެފައެވެ. ކޯޓުން ވަނީ ކުޑަކުދިންގެ އަބުރާއި އިއްޒަތް ރައްކާތެރިކުރުމަކީ ކޮންމެހެން ކުރަންޖެހޭނެ ކަމެއް ކަމަށް ކަނޑައަޅާފައެވެ.
ބައްޗަން އާއިލާއިން ވަނީ މީގެ ކުރިންވެސް އެ އާއިލާގެ މެމްބަރުންގެ ނަމާއި، އަޑު އަދި ފޮޓޯ ހުއްދަ ނެތި ބޭނުންކުރުން ހުއްޓުވުމަށް ގާނޫނީ ފިޔަވަޅުތައް އަޅާފައެވެ. އަބީޝެކްގެ ބައްޕަ، އަމީތާބް ބައްޗަން ވެސް ވަނީ "ޕާސަނަލިޓީ ރައިޓްސް" ގެ ދަށުން ކޯޓު އަމުރެއް ހޯދާފައެވެ. މި ފަހަރުގެ ނިންމުމަކީ ސޯޝަލް މީޑިއާގައި މަޝްހޫރު މީހުންގެ ދަރިންނާ ގުޅޭގޮތުން ފަތުރާ ދޮގު މައުލޫމާތު ހުއްޓުވުމަށް އެޅުނު މުހިންމު ބާރަކަށް ވެގެންދާނެއެވެ.
