އެގޮތުން މި ބިލު ބަލައިިގަތުމަސް ފާސްކޮށްފައިވަނީ 53 މެމްބަރުންގެ ވޯޓުންނެވެ. އަދި މި ބިލު ބަލައިގަތުމަށް ނުފެންނަކަމަށް ހަ މެމްބަރުން ވޯޓު ލައްވާފައިވެއެވެ.
މި ބިލް ފާސްވުމާއި އެކު ވަނީ ދިރާސާކުރުމަށް ލާމަރުކަޒީ ކޮމިޓީއަށް ފޮނުވާފައެވެ.
މި ބިލުގައި ވާގޮތުން މިއަހަރު ބާއްވަންޖެހޭ ލޯކަލް ކައުންސިލް އިންތިހާބު ބޭއްވި އަލަށް އިންތިހާބުވާ ފަރާތްތައް މަގާމާއި ހަވާލުވަންދެން މިހާރު މަގާމުތަކުގައި ތިބިި ފަރާތްތައް މަގާމުގައި ދެމި ތިބޭނެކަމަށެވެ.
މި ބިލާއި ގުޅޭގޮތުން މިއަދުގެ ޖަލްސާގައި ވާހަކަ ދައްކަވަމުން ގިނަ މެމްބަރުން ފާހަގަކޮށްފައި ވަނީ މި ބިލަށް ބޮޑެތި އިސްލާހުތަކެއް ގެންނަންޖެހޭކަމަށެވެ.
ކޮވިޑް19 އާއި ގުޅިގެން އިއުލާނު ކޮށްފައިވާ އާންމު ސިއްހަތުގެ ކުއްލި ނުރައްކަލުގެ ހާލަތާއި ގުޅިގެން މިއަހަރު ބޭއްވުމަށް ހަމަޖެހިފައިވާ ކައުންސިލް އިންތިހާބު ވަނީ ފަސްކޮށްފައެވެ. އަދި އެ ފަސްކުރާ މުއްދަތުގައި ޤާނޫނީ ހުސްކަމަކަށް ނުގޮސް ކައުންސިލްތަކުގެ ދައުރުދަންމާލުމަށް ސަރުކާރު ފަރާތުން ޤާނޫނުއަސާސީއަށް ވަނީ އިސްލާހު ހުށަހަޅާފައެވެ. އެހެން ނަމަވެސް މިއީ ޤާނޫނުއަސާސީ އިސްލާހުކުުރުމަށް އެންމެ ރަނގަޅު ވަގުތު ނޫންކަމަށް މަޖިލީހުގެ ރައީސް އަދ ކުރީގެ ރައީސް މުހައްމަދު ނަޝީދާއި މެމްބަރުން ވަނީ ބުނެފައެވެ. އަދި އެކަމުގެ ސަބަބުން މެމްބަރު ހަސަން ލަތީފް ވަނީ ދައުރު ދަންމާލުމަށް ވަކި ބިލެއް މަޖިލީހަށް ހުށަހަޅާފައެވެ.
އެ ބިލު މަޖިލީހަށް ހުށަހަޅުއްވަމުން ހަސަން ލަތީފް ވިދާޅުވީ މި ޤާނޫނު ވުޖޫދުކުރާއިރު ޤާނޫނުއަސާސީގެ ރޫހާއި އެއްގޮތަށް އެކަންކުރުމަކީ މުހިންމު ކަމެއްކަމަށް ދެކޭކަމަށެވެ.
