މި ޕްރޮމޯޝަންގެ ދަށުން ކަސްޓަމަރުންނަށް ދިނުމަށް ކަނޑައަޅާފައިވާ ދެ ލޯންޗުގެ ތެރެއިން، ފުރަތަމަ ލޯންޗަށް ގުރުއަތު ނެގުމަށްޓަކައި އެންރޯލް ކުރުމުގެ ސުންގަޑި މި ހިނގާ މަހުގެ 31 ވަނަ ދުވަހުގެ ނިޔަލަށް ހަމަވާނެ އެވެ.
މި އަގުހުރި ޕްރޮމޯޝަންގައި ދިރާގުގެ ޕްރީޕެއިޑް، ޕޯސްޓްޕެއިޑް އަދި ފައިބަ ބްރޯޑްބޭންޑް ކަސްޓަމަރުންނަށް ބައިވެރިވެވޭނެ އެވެ. އެގޮތުން ޕްރީޕެއިޑް ކަސްޓަމަރުން 450 ރުފިޔާ ނުވަތަ އެއަށްވުރެ މަތިން ރީލޯޑް ކުރުމުންނާއި، ޕޯސްޓްޕެއިޑް އަދި ފައިބަ ބްރޯޑްބޭންޑް ކަސްޓަމަރުން 450 ރުފިޔާ ނުވަތަ ފައިބަ 40 އެމް އިން ފެށިގެން މަތީގެ ޕްލޭނެއް ގެންގުޅޭނަމަ މި ޕްރޮމޯޝަންގައި ބައިވެރިވެވޭނެ އެވެ. މީގެ އިތުރުން ދިރާގު ޕޭ އަށް ރަޖިސްޓަރީ ކުރުމުން ނުވަތަ މުއްދަތުގެ ތެރޭގައި އަލަށް ރަޖިސްޓަރީ ވާ ފަރާތްތަކަށް ލޯންޗު ހޯދުމުގެ ފުރުސަތު އިތުރުވެގެންދާނެ ކަމަށް އެ ކުންފުނިން ބުންޏެވެ.
މި ޕްރޮމޯޝަންގެ ނަސީބުވެރިންނަށް ދިނުމަށް ހަމަޖެހިފައިވަނީ އަލް ޝާލީ މެރިންގެ "ކެނެރީ 28" މޮޑެލްގެ ސްޕޯޓްސް ސްޕީޑްބޯޓެކެވެ. މިއީ ޔަމަހާ 250 ހޯސްޕަވަރުގެ އިންޖީނަކާ އެކު، ކަނޑުމަތީގެ އެކި ބޭނުންތަކަށް ހިފޭގޮތަށް ފަރުމާކޮށްފައިވާ ފެންވަރު ރަނގަޅު އުޅަނދެކެވެ. ދިރާގުން މައުލޫމާތު ދޭ ގޮތުގައި މި ޕްރޮމޯޝަނަށް ހާއްސަ ޕޯޓަލް މެދުވެރިކޮށް ކަސްޓަމަރުންނަށް ފަސޭހަކަމާ އެކު އެންރޯލް ކުރެވޭނެ އެވެ.
ދިރާގުން މަސައްކަތް ކުރަމުން އަންނަނީ ކަސްޓަމަރުންގެ ދިރިއުޅުމަށް ފާގަތިކަން ގެނުވައިދޭ ފަދަ ތަފާތު ޕްރޮމޯޝަންތައް ހިންގުމަށެވެ. ފުރަތަމަ ލޯންޗު ހޯދުމުގެ ފުރުސަތު މި މަހުގެ ނިޔަލަށް ހަމަވާއިރު، މުޅި ޕްރޮމޯޝަންގައި ބައިވެރިވުމުގެ އެންމެ ފަހު ތާރީހަކީ 31 މާޗް 2026 އެވެ.
