މިކަން ހާމަކޮށްފައިވަނީ މޯލްޑިވްސް ސޮސައިޓީ ފޯ ޕާފޯމިން އާޓްސް (އެމްއެސްޕީއޭ) އިންނެވެ.
އެމްއެސްޕީއޭ އިން މައުލޫމާތު ދީފައިވާ ގޮތުގައި، ޑޮކްޓަރުންގެ ލަފަޔާ އެކު ނިމާލް ބޭރަށް ގެންދިއުމަށް ވާންޖެހޭ ތައްޔާރީތައް މިހާރު އަންނަނީ ވަމުންނެވެ. ނިމާލަށް ސްޓްރޯކެއް ޖެހިފައިވަނީ ހުސްވި ޑިސެމްބަރު މަހުގެ 31 ވަނަ ދުވަހުގެ ރޭގެ ވަގުތެއްގައެވެ.
އޭނާއަށް އެންމެ ފުރަތަމަ ފަރުވާ ދީފައިވަނީ އޭޑީކޭ ހޮސްޕިޓަލުގައެވެ. ނަމަވެސް މިހާރު ފަރުވާ ދެމުން އަންނަނީ އައިޖީއެމްއެޗުގެ އައިސީޔޫގައެވެ. އާއިލާއިން ބުނި ގޮތުގައި ނިމާލްގެ ހާލު މިހާރު އަންނަނީ ކޮންމެވެސް ވަރަކަށް ރަނގަޅުވަމުންނެވެ. ނިމާލް އަކީ ދިވެހި ފިލްމީ ދާއިރާގައި ގިނަ ދުވަސްތަކެއް ވަންދެން ހިދުމަތް ކޮށްފައިވާ ހުނަރުވެރި ފަންނާނެކެވެ.
