ކޮވިޑް-19 އާ ގުޅިގެން އެގައުމަށް ސިއްހީ ސާމާނު ހިފައިގެން ދަތުރުކުރި ކާގޯ ފްލައިޓެއް ވެއްޓި އެ ފްލައިޓް ގައި ތިބި ހަ މީހަކު މަރުވެފައިވާ ކަމަށް އެ ގައުމުގެ ޓްރާންސްޕޯޓް މިނިސްޓަރު މުހައްމަދު ސަލާދްއާ ހަވާލާދީ އަލްޖަޒީރާގައި ރިޕޯޓްކުރެ އެވެ.
ސަލާދް ވިދާޅުވީ، ދަތުރު ކުރަމުން ދިޔަ ކާގޯ ފްލައިޓްގައި ތިބި ހަ މީހުންގެ ތެރޭގައި، ޕައިލެޓް އާއި ކޯ ޕައިލެޓް އަދި ފްލައިޓް އިންޖިނިއަރުގެ އިތުރުން ޓްރެއިނީ ޕައިލެޓަކާއި އެ އެއާލައިނުގައި މަސައްކަތް ކުރާ ދެ މީހުން ތިބި ކަމަށެވެ. ޖުމްލަ ހަ މީހުން ތިބި ނަމަވެސް އަދި ފެނިފައި ވަނީ ފަސް ހަށިގަނޑުކަން ވެސް ސަލާދް ފާހަގަކުރައްވަ އެވެ.
ސޯމާލީ ނޭޝަނަލް ނިއުސް އޭޖެންސީ އިން ރިޕޯޓު ކޮށްފައިވާ ގޮތުގައި ވެއްޓިފައިވާ ފްލައިޓަކީ އެފްރިކަން އެކްސްޕްރެސް އެއާވޭސް ގެ ފްލައިޓެކެވެ.
ސޮމާލިއާގައި ވެސް މި ބަލި ފެތުރެމުން އަންނައިރު މިހާތަނަސް އެގައުމުން 756 މީހަކަށް ބަލި ޖެހިފައިވެ އެވެ. އަދި 35 މީހަކު ވަނީ މަރުވެފަ އެވެ.
