އުމުރުން 83 އަހަރުގެ އަމީތާބް އޭނާގެ ރަސްމީ ބްލޮގްގައި ލިޔެފައިވާ ގޮތުން، ކޮންމެ ދުވަހަކީ ވެސް އާ އެއްޗެއް ދަސްވާ ދުވަހެކެވެ. ނަމަވެސް އޭނާގެ އެންމެ ބޮޑު ހިތާމައަކީ، މީގެ އަހަރުތަކެއް ކުރިން ދަސްކުރަން ޖެހޭ ކަންކަން އޭރު ދަސްކުރެވިފައި ނެތުމެވެ.
އަމީތާބް އިތުރަށް ފާހަގަކުރެއްވި ގޮތުގައި މިހާރު ޒަމާން ބަދަލުވެ، އާ އީޖާދުތައް ތައާރަފުވާލެއް އަވަސްކަމުން އެއްޗެއް ދަސްކުރަން ފަށާއިރު އޮންނަނީ ވަގުތު ފާއިތުވެފަ އެވެ. ނަމަވެސް މިހާރު އޮތް އެންމެ ބޮޑު ފަސޭހައަކީ، ތިމާއަށް ނޭނގޭ ކަންކަން އެކަމުގެ މާހިރުން ލައްވައި ކުރުވުން ނުވަތަ "އައުޓްސޯސް" ކުރެވެން އޮތުން ކަމަށް އޭނާ ބުންޏެވެ.
އިންޑިއާގެ ސިނަމާއަށް 40 އަހަރަށްވުރެ ގިނަ ދުވަހު ޚިދުމަތްކޮށް، އެންމެ މޮޅު އެކްޓަރުގެ ނެޝަނަލް އެވޯޑް 4 ފަހަރު ހޯދާފައިވާ އަމީތާބް ދާދި ފަހުން ވަނީ "ކޯން ބަނޭގާ ކްރޯޕަތީ" (ކޭބީސީ) ގެ 17 ވަނަ ސީޒަން ނިންމާލާފަ އެވެ. އަދި އޭނާ އެންމެ ފަހުން ފެނިގެންދިޔައީ ރަޖްނީކާންތާއެކު ކުޅުނު ފިލްމު "ވެއްޓައިޔަން" އިންނެވެ.
