އެޕިސޯޑް 63
ވިސްނާލާފަދަ ގޮތެއް ފަރީހާގެ މޫނުން ފެނުނެވެ.
"ކިސްވާ ރައްކާތެރިކުރާންޖެހޭ، އެހެން އެއްވެސް ސަބަބެއް ނެތްކަން އަމާރާއަށް ޔަގީންތަ؟" ޖެހިލުމެއް ނެތި ފަރީހާގެ ނަޒަރު ސީދާކޮށްލީ އަމާރާގެ ލޮލަށެވެ.
އަވަސް އަވަހަށް އަމާރާގެ އެސްފިޔަތަށް ހަރަކާތްކޮށްލީ އޭނާގެ ގަސްތަކު ނޫނެވެ.
"މަންމާ، ހަގީގަތް މި ބުނެދިނީ..!" އަމާރާގެ ސައި ތައްޓަށް އޭނާގެ ސަމާލުކަން ހުއްޓާލެވޭތޯ މަސައްކަތް ކުރި އެވެ.
އަމާރާގެ 'ކުރު ތަފްސީލަށް' ފަރީހާގެ ހިތުގެ ރުހުން ނުލިބުނެވެ. ނަމަވެސް އަމާރާގެ ދެ ލޮލުގެ އަސަރާއި މޫނުމަތީގެ ނުތަނަވަސްކަމަށް ބަލާފައި ފަރީހާގެ ސުވާލު ފޮށީގައި މިވަގުތަށް ތަޅު އެޅުވީ އެވެ.
"އޯކޭ.. އަމާރާ ބޭނުން ގޮތެއް..! އެކަމަކު އަމާރާ ހަނދާންކުރަންވާނެ، ކޮންމެ 'ދޮގަކަށް' އޮންނާނީ ކުރު މުއްދަތެއް.. ކިތަންމެ ފުނުގައި ވަޅުލިޔަސް، ދޮގު ސިއްރެއް ނުވާނެ" ނަސޭހަތެއްގެ ގޮތުގައި ބުނެދެވެން އޮތް މިންވަރަށް ފަރީހާ ބުނެދިނެވެ.
ދަރިފުޅުގެ 'ބޮޑު ސިއްރުގައި' އެޅުވި ތަޅު ހުޅުވާނެ އިރަކަށް އެ މަންމަ އިންތިޒާރުކުރާނެކަން އަމާރާއަށް އެނގޭކަން ފަރީހާ ދަނެ އެވެ.
ކަރުނުން ފުރިފައިވާ ދެ ލޮލުގެ އެސްފިޔަތަށް ތަގުޅިކޮށްލަމުން، އަމާރާ ފުރަގަސްދިނީ ބޮލުން 'އާއެކޭ' ބުނަމުންނެވެ.
................
ތިންހަފްތާ ފަސް..
ކައިވެނީގެ ތާރީހްތަކާއި ހަފްލާތަށް ބާއްވާނެ ތަންތަން ކަނޑައެޅުމަށްފަހު، އެޕާޓްމެންޓުން ނިކުމެގެން ޝައްޔާން އެ ނިކުތީ ހިތްހަމަޖެހިގެން ނެވެ. ފަރީހާއާއެކު ދެކެވުނު ވާހަކަތަކުގައި ވަނީ ގާތްކަމާއި އޯގާތެރިކަމެވެ. އެކަމަކު ޝައްޔާންގެ ނިއްކުރީގައި ރޫތަށް ގިނަވެ، ދެ ބުމަ ދޭތެރެ ބަރުވެފައި ވަނީ ގޮތް ނޭގޭ ސުވާލުތަކަކުންނެވެ. ހަވީރުގެ މިފަދަ ގަޑިއެއްގައި އެ ގެއަށް އަންނާން ޝައްޔާން ނިންމީވެސް އަމާރާ ގޭގައި އުޅޭނެކަމަށް ވިސްނާފަ އެވެ. ނަމަވެސް ފަރީހާ ނޫން އެހެން މީހަކު އެވަގުތު ގެއަކު ނެތެވެ.
ހަވީރުގެ ފިނި ވައިރޯޅި ޖެހެމުންދިޔަ އެންމެ ހިތްގައިމު ވަގުތެވެ. އަމާންކަން ނުލިބުނީ ޝައްޔާންގެ ހިތަށެވެ. އެޕާޓްމެންޓްގެ ބަގީޗާގެ ތެރެއިން ލާފައި، ކާރުޕާކިންއާއި ދިމާއަށް ޝައްޔާން މިސްރާބުޖެހީ ބުނެދޭން ނޭގޭ އެތަށް ފިކުރަކާއި ހަނގުރާމަކުރަމުންނެވެ. ފުލުފުލުގައި ފޯނު ވައިބްރޭޓްވަމުން ދިއަޔަސް، އެކަމަށް އޭނާގެ ސަމާލުކަމެއް ނެތެވެ.
ކުރިއަށް އަޅަން ނެގި ފިޔަވަޅު ކުއްލިޔަކަށް ހުއްޓުނީ އޭނާގެ ކަންފަތުގައި 'ތަފާތު' އަޑެއް ބީހިލީތީ އެވެ.
އެއީ މައުސޫމް ހިނިތުންވުމެކެވެ.
ލޯބި ލޯބި އަޑެކެވެ.
އަމާންކަމުގެ ވައިޜޯޅިން ޝައްޔާންގެ ކަނދުރާގެ ހިމަލޯލިތަށް ކޮޅަށް ޖެހިއްޖެ އެވެ.
އެއަޑު އައި ދިމާއަށް މިސްރާބު ޖެހުނީ އިހްތިޔާރެއް ނެތި އެވެ. ފޮޅިފައިވާ މާ ގަސްތަކާއި ކައިރިވި ވަރަކަށް ހިތްގައިމު އެ 'މިއުޒިކީ އަޑު' ދިޔައީ ގަދަވަމުންނެވެ.
ދެ އަތުން ގަސްތަށް އެއް ފަރާތް ކޮށްލާފައި ޝައްޔާން ބަލައިލި އެވެ. ހިނިތުންވުން، އޭނާގެ މުޅި މޫނު އުޖަލާކޮށްލުމަށް ސިކުންތެއް ވެސް ނުނެގި އެވެ.
އެއީ ކިސްވާ އެވެ. ކިސްވާގެ ހިނިތުންވުމުގެ މިއުޒިކީ އަޑެވެ.
އުދުހެމުންދިޔަ ކޮކާތަކާއި ސަމާސާކުރަމުން، ގަސްތަކުގެ ތެރެއިން ޝާއްޔާންއަށް ފެނުނީ އޭނާގެ ކިސްވާ އެވެ. މަޑުމަޑު ކްރީމް ކުލައިގެ 'ޕްރިންސެސް ޑްރެސްގައި' ކިސްވާ ފެންނަނީ ޕަރީއެއް ފަދައިންނެވެ. ކިސްވާގެ ކޮންމެ ހަރަކާތެއް ޝައްޔާންގެ ސަމާލުކަން ހޯދި އެވެ. ކުއްލިޔަކަށް އަމާރާގެ މޫނުގެ ވަނާތަށް ޝައްޔާންގެ ދެ ލޮލުގެ އެސްފިޔަތަކުގެ ތެރެއިން ދައުރުވާން ފެށި އެވެ. ލިބުނު ހައިރާންކަމުގައި ފިޔަވަޅު އެޅުނީ ކުރިއަށެވެ. ކިސްވާއާއި ގާތަށެވެ.
ދެ ލޮލުގައި ވަނީ މައުސޫމްކަމެވެ. ޝައްޔާންގެ ލޮލުގެ އެސްފިޔަތަށް ވަނީ ހުއްޓިފަ އެވެ. ފެންނަމުންދިޔައީ އަމާރާ އެވެ. ކުރިމަތިވި ދަތި އުނދަގޫ ދަނޑިވަޅުގައި ގޮތް ދޫކުރުމެއް ނެތި، ޝައްޔާންއާއި ބަހުސްކޮށް ފަސްދީ ދިޔަ އަމާރާއެއް ނޫނެވެ. އެއީ އެ ކުއްޖެއްގެ ލޯބީގައި ޝައްޔާން ދީވާނާވި، މައުސޫމު އަމާރާގެ ސާދާ މިޒާޖެވެ. ދުނިޔޭގެ ނަފްރަތާއި މަކަރާއި ހީލަތަށް ފިކުރުކުރުމެއްނެތި، ވެހެމުންދާ ކެރީގެ ފިނި ކަމުގައި ތެމިގެން، ޝައްޔާންގެ އަތު ނުޖެހޭން ދުވި އުފާވެރި އަމާރާ އެވެ.
މިއަދު ހަމަ އެ ސިފައިގައި އޭނާގެ ކުރިމަތީން ފާޅުވަމުން އެދަނީ، އަމާރާގެ ހުރިހައި ސިފައެއް ނަކަލު ކޮށްފައިވާ ކުޑަކުޑަ ދަރިއެކެވެ. އެއީ ކިސްވާ އެވެ. ކިސްވާގެ ލޮލާއި ކަޅިރަވައިގައި ވަނީ ޝައްޔާންގެ ހަނދާންތަކެވެ. ތޫނު ކޯ ކަށިގަނޑާއި ތަނަވަސް ނިއްކުރިއާއި ތުންފަތުގެ ބައްޓަމަކީ އަމާރާގެ ސިފަތަކެވެ. އެ ރީތި ހިނިތުންވުމާއި އެހެން މީހުންގެ ހިތުން ޖާގަހޯދުމަކީވެސް މަންމަގެ ކިބައިން އެ ދަރިފުޅަށް ވާރުތަކޮށްފައިވާ ސިފަތަކެވެ. ޝައްޔާންގެ ކަނދުރާއިން ފެށިގެން ފައިގެ ދަށްފުށާއި ހަމައަށް ހުރި ހުރިހާ ލޯލިތަށް ވަނީ ކޮޅަށް ޖެހިފަ އެވެ.
"އައްސަލާމް އަލައިކުމް، ބިއުޓިފުލް ޕްރިންސެސް..!" ކިސްވާ ސިއްސައިގެން ނުދާނެ މިންވަރު އަންދާޒާކުރަމުން ޝައްޔާން ގާތްވެލީ ކިސްވާގެ ފުރަގަހުންނެވެ.
އިވުނު ސަލާމުގެ އަޑާއެކު އޭނާގެ އަތުގައި ޖެހުނު ކޮކާ މާ ބާރަށް އުދުހިގަތުމުން ތުންކޮޅު އޫ ކޮށްލާފައި ކިސްވާ ފަހަތް ބަލައިލީ، ލިބުނު މާޔޫސްކަމުގަ އެވެ. ނަމަވެސް މޫނުމަތީގެ އުފާވެރިކަމުގެ ރީތި ކުލަތަކަށް ފަނޑުކަމެއް ނެތެވެ.
"ވައަލައިކުމުއް ސަލާމް، ހޭންޑްސަމް ކިންގް!" ހައިރާންވެ، ބައްޓަން ރީތި ދެ ލޯ ވަށްކޮށްލާފައި ކިސްވާ ބުނެލި އިރު ދެ ލޮލުގެ ބެބުޅުން ގަދަވެއްޖެ އެވެ.
ދެ އަތް ފުޅާކޮށްލާފައި ޝައްޔާންއާއި ދިމާއަށް އައި ވަގުތު ބިމުން މައްޗަށް ކިސްވާ އުފުލާލީ، ހިތްގައިމު ފިލްމީ މަންޒަރެއް ފަދައިންނެވެ.
"އައި މިސްޑް ޔޫ ކަޕްކޭކް.." ދެއަތުގެ ތެރޭގައި ކިސްވާ ބޮނޑިކޮށްލަމުން ޝައްޔާން ބުނެލި އެވެ.
"އައި މިސްޑް ޔޫ ލައިކް ޔުނިވަރސް މަޗް.." ކިސްވާ ބުނަން އުޅުނު އެއްޗެއް ޝައްޔާންއަށް އޮޅިފައެއް ނެތެވެ. ދެމީހުންގެ ހިނިގަނޑުގެ އަޑު ހިތްގައިމު މެހެފިލްގައި ގުގުމާލީ އެތަނުގައި އެވަގުތު އުޅުނު އެތަށް މީހެއްގެ ސަމާލުކަން ހޯދަމުންނެވެ.
"މިހާރު ރެސްޓޯރެންޓަށްވެސް ފޭކް ޕާޕާއެއް ނާންނަމެއްނުން.." ޝައްޔާންގެ ކަނދުރާގައި ބާރަށް ބައްދާލަމުން ކިސްވާ ކޮށްލީ ޝަކުވާއެކެވެ.
"ވަރަށް މައާފް، ޕްރިންސެސް.. ދެން ފެންނާނެ އިން ޝާ ﷲ" ބަޔާންކުރާން ނޭގޭ އަސަރަކާއެކު ޝައްޔާން ބުންޏެވެ.
"މިތަނުގައި ޕްރިންސެސް ކީއްތިކުރަނީ؟ މީހަކާ ބައްދަލުކޮށްލަން އައިސްތަ..؟" ހިތުގައި އޮތް ބޮޑު ސުވާލު ޝައްޔާން ތިލަކޮށްލި އެވެ.
ސުވާލުގެ ފަހުބައި ނުނިމެނީސް ކިސްވާގެ ބޮލުގެ އިޝާރާތުން ނޫނެކޭ ބުނަން ފަށައިފި އެވެ.
"ނޫން.. ކިސްވާ އުޅެނީ މިތަނުގައި" ކިސްވާގެ އިޝާރާތުން ޝައްޔާން އަށް ދައްކައިލީ ދެންމެ ޝައްޔާން ނިކުމެގެން އައި އެޕާޓްމެންޓް ކޮމްޕްލެކްސް އެވެ.
"މިތާ އުޅޭ ކުއްޖަކު، އެހައި ދުރުގައި ހުންނަ ރެސްޓޯރެންޓަކަށް ކޮންމެ ދުވަހަކު ދަނީ ކީއްވެ؟" ވިސްނާލާފަދަ ގޮތެއް ދައްކައިލަމުން ޝައްޔާން ސުވާލުކޮށްލީ ބިންމަތީގައި ކިސްވާ ބަހަށްޓަމުންނެވެ.
"ޔެސް.. އެއީ މަންމަގެ ފެމިލީ ރެސްޓޯރެންޓެއް.. އެހެންވީމަ ކިސްވާ ކިތަންމެ ދުރުގަ އުޅުނަސް އެތަނަށް ދަނެ.. ކޮންމެ ދުވަހަކު ހަވީރު މި ޕާކަށް ކުޅެން އަންނަނީ ހުރިހައި ބަޓަރފްލައިތަށް ކިސްވާއަށް މަޑުކޮށްގެން ތިބޭތީ.." ފަހުރުވެރިވެލާފައި ކިސްވާ ބުނެލީ، ލޯބިގޮތެއް އޭނާގެ ލޮލަށް ހަދައިލާފަ އެވެ.
އެއިން ކޮންމެ އިޝާރާތަކުން ޝައްޔާންގެ ހިތުގައި ޖަހަމުންދިޔައީ ބާރުގަދަ ވިންދެކެވެ. ލޮލުގެ ހިމަކޮޅުން ކިސްވާ ބަލައިލާ ގޮތުން، އަމާރާއާއި ކުޑަވެސް ތަފާތެއް ނެތެވެ. ބަސް ހުއްޓި ހަރަކާތެއް ނެތިފައި ޝައްޔާންއަށް އިރުކޮޅަކު ހުރެވުނީ، މިކުޑަކުޑަ ކުއްޖާގެ ހަގީގަތް ދެނެގަތުމަށް އޭނާގެ ހަވަނަ ހިއްސު މަޖުބޫރުކުރާތީ އެވެ.
"ކޮބާ ކިސްވާގެ މަންމަ..؟" (ނުނިމޭ)
